Futbol üzrə Azərbaycan millisinin yarımmüdafiəçisi Ozan Can Kökçü Niderlandın “Eyndhoven” komandasında növbəti matçına çıxıb.
Arena.az xəbər verir ki, 25 yaşlı futbolçu Niderland Birinci Divizionunda 2023/2024 mövsümünün sonuncu – 38-ci turu çərçivəsində keçirilmiş “Den Boş”la oyunun iştirakçısı olub.
“Eyndhoven” doğma meydanda baş tutan mövsümün son oyunundan inamlı qələbə ilə ayrılıb – 2:0.
Ozan Can bu görüşün 75-ci dəqiqəsində meydana buraxılıb. Komandasının 2-ci qolunu da 88-ci dəqiqədə məhz millimizin üzvü vurub. Bununla da o, mövsümdə 12-ci qoluna imza atıb. Yarımmüdafiəçinin hesabında 4 məhsuldar ötürmə də var.
“Eyndhoven” 38 oyunda qazandığı 43 xalla 2023/2024 mövsümünü 20 kollektiv arasında 14-cü pillədə başa vurub. Komanda 9 qələbə qazanıb, 16 heç-heçə edib və 13 məğlubiyyətə üzülüb. Ozan isə bu mövsüm kubok görüşləri də daxil olmaqla, bütövlükdə 40 oyuna çıxıb, 12 qol vurub, 4 məhsuldar ötürmə verib.
Xatırladaq ki, Ozan Can Kökçü “Eyndhoven”ə 2022-ci ilin yayında “Telstar”dan gəlib. Yarımmüdafiəçi daha öncə “Valveyk” və “Girəsunspor” komandalarının, həmçinin “Sabah”ın da uğurları üçün çalışıb. Ozan Azərbaycanın U-20 və U-21 yığmalarının da formasını geyinib, 2022-ci ildən isə əsas milliyə dəvət alır. O, “Eyndhoven”də bütövlükdə 78 oyuna çıxıb, 19 qola imza atıb, 4 məhsuldar ötürmə müəllifi olub.
