Neymar “Əl-Hilal”ın super kubok zəfərindən söz açdı

“Əl-Hilal”ın braziliyalı ulduzu, hücumçu Neymar Səudiyyə Ərəbistanı Super Kubokundakı qalibiyyəti haqda söz açaraq zarafatlaşıb.

Arena.az məlumat verir ki, Neymar özünün sosial şəbəkə hesabı üzərindən açdığı yayımında “Əl-Hilal”ın “Əl-İttihad” üzərində 4:1 hesablı qələbə ilə Səudiyyə Ərəbistanı Super Kubokunu qazanmasını belə şərh edib:

“Hər şey lap məktəbdəki kimidir: uşaqlar tapşırığı yerinə yetirirdilər, mən isə sadəcə qiymətlər alırdım”, deyə “Ney” zarafatlaşıb.

Neymar ötən ilin yayında, PSJ-də 6 il keçirdikdən sonra “Əl-Hilal”a keçib. Tərəflər arasında sonradan 1 il uzadılmaq imkanını özündə ehtiva edən, müddəti 2025-ci ilin iyun ayının sonuna qədər nəzərdə tutulmuş müqavilə imzalanıb. Transfer ərəblərə 90 milyon avroya başa gəlib. Bu məbləğ Neymarın təxmin edilən bazar qiymətindən bahadır.

Cari mövsümdə təcrübəli hücumçu “Əl-Hilal”ın heyətində bütün yarışlarda 5 oyuna çıxıb, 1 qol vurub, 3 məhsuldar ötürmə verib.
Neymar 2010-cu ilin avqustunda debüt etdiyi Braziliya yığmasının heyətində 128 oyun keçirib, 79 qol vurub, 58 məhsuldar ötürmə verib.

“Transfermarkt” internet-portalı 32 yaşlı braziliyalı vingerin transfer dəyərini 45 milyon avro məbləğində qiymətləndirir.

Xatırladaq ki, Neymar 2026-cı il dünya çempionatının seçmə mərhələsi çərçivəsində Braziliya millisinin Uruqvay yığmasına qarşı keçirdiyi oyunda (0:2) ağır zədə almış və bu səbəblə cərrahi əməliyyat edilmişdi.

Hazırda ulduz futbolçu dizinin çarpaz bağının yırtığından sonra bərpa prosesi keçir və fiziki formasının bərpası üzrə məşqlərlə məşğuldur.