18 yaşdan yuxarı gənclərə Avropaya səfər üçün on minlərlə qatar bileti hədiyyə ediləcək

Avropa Birliyi Komissiyası “DiscoverEU” proqramı çərçivəsində 18 yaşdan yuxarı gənclərə on minlərlə qatar biletinin hədiyyə ediləcəyini açıqlayıb.

KONKRET.az xəbər verir ki, Brüsseldən verilən mesajda gənclərə təklif ediləcək qatar bileti sayının 35 min 500 olduğu açıqlanıb.

“Deutsche Welle Turkish” xəbər verir ki, bu biletlərdən birini qazanmaq üçün gənclərin 1 iyul 2005-ci il – 30 iyun 2006-cı il tarixləri arasında doğulmuş olması və Avropa Birliyi ilə bağlı 5 sual və əlavə tamamlayıcı sualdan ibarət testdən keçməsi lazımdır.

Bilet qazanan gənclər 1 iyul 2024-cü il və 30 sentyabr 2025-ci il tarixləri arasında 30 gün ərzində Avropa daxilində səyahət edə biləcəklər. Müsabiqəyə İslandiya, Lixtenşteyn, Şimali Makedoniya, Norveç, Serbiya və Türkiyədən, eləcə də Avropa Birliyi ölkələrindən müraciətlər edilə bilər. Əlilliyi olan və ya səhhətində problem olan gənclər səyahət zamanı dəstək ala biləcəklər.

Müraciətlər üçün hər bir ölkəyə müəyyən kvota ayrılıb. Türkiyəyə ayrılan kvotaların sayı isə 1476 olub. Almaniya 6 min 104 nəfərlə ən yüksək kvotaya sahib olub. 4 min 946 nəfər Fransaya, 4 min 364 nəfər İtaliyaya və 3 min 476 nəfər İspaniyaya ayrılıb. Ən az kvotaya malik ölkələr 16 nəfərlə Şimali Makedoniya, 17 nəfərlə Lixtenşteyn və 18 nəfərlə Serbiyadır.

Qeyd edək ki, ötən il Türkiyədən olan gənclər proqrama böyük maraq göstərib və Türkiyəyə ayrılan kvota 1467 nəfər olsa da, Türkiyədən 21 mindən çox müraciət edilib.

Xatırladaq ki, “Aİ-ni kəşf et” təşəbbüsü 2018-ci ildə 18 yaşdan yuxarı Avropa İttifaqı vətəndaşlarına İnterrail bileti təklif etmək və bununla da Avropa qitəsini tanımaq imkanı yaratmaq məqsədi ilə başladılıb. Aİ Komissiyasının məlumatına görə, indiyədək 1 milyondan çox gənc 284 min bilet qazanmaq üçün müraciət edib.

Günel Mikayılova,

KONKRET.az