ABŞ-ın vitse-prezidenti Kamala Harrisin qarşıdan gələn seçkilərdə qələbəsi nüvə silahlarının ştirak edəcəyi üçüncü dünya müharibəsinin başlanmasına gətirib çıxaracaq.
Teleqraf.com xəbər verir ki, bunu Respublikaçılar Partiyasından ABŞ prezidentliyinə namizəd Donald Tramp Demokratlar Partiyasının namizədi Kamala Harrisin Çikaqoda keçirilən Milli Qurultayda çıxışını şərh edərkən deyib. Harris noyabrın 5-də keçiriləcək seçkilərdə Demokratlar Partiyasından dövlət başçısı vəzifəsinə namizədliyini irəli sürməyə razı olduğunu rəsmən elan edib.
“Kamala Harrisin gələcəyi olmayacaq, çünki o, bizi üçüncü nüvə dünya müharibəsinə aparacaq! O, heç vaxt dünya tiranları tərəfindən hörmətlə qarşılanmayacaq!” - Tramp “Truth” sosial şəbəkəsindəki səhifəsində yazıb.
Tramp həmçinin Harrisi çıxışı zamanı “ölkəni məhv edən” ciddi məsələlərə toxunmadığına görə tənqid edib. "ABŞ-da Demokratlar Partiyasının rəhbərliyi altında 60 milyon insan yoxsulluq içində yaşayır və Harris onlardan heç danışmır!" - Ağ Evin keçmiş sahibi əlavə etdi.
