“Mançester Siti”nin və “Börnli”nin keçmiş futbolçusu Coi Barton “Mançester Yunayted”in hücumçusu Meyson Qrinvud haqda danışıb.
Arena.az Bartonun bu barədə fikirini təqdim edir:
“İngiltərə yığması heyətində bu oğlanla Avropa çempionatını qazanacaqdı. O, hələ də bu Avropa çempionatında milli komandanın digər oyunçuları qədər yaxşıdır”, deyə Coi Barton vurğulayıb.
Xatırladaq ki, Qrinvud AÇ-2024-də iştirak etmiş İngiltərə yığmasının heyətinə cəlb edilməmişdi.
Daha əvvəl isə Qrinvudun Marselo “Olimpik”i ilə müqaviləni razılaşdırdığı haqda məlumat yayılıb.
Qrinvud “Mançester Yunayted”in yetirməsidir. O, 2018-ci ildən bu klubun əsas komandasında çıxış erməyə başlayıb. Amma hücumçu 2022-ci ilin 30 yanvar tarixindən rəsmi oyunlarda iştirak etmirdi. Meyson zorlamaya cəhd və hücumda şübhəli bilinərək həbs olunduqdan sonra 18 aydan çox “qırmızı şeytanlar”ın heyətində oynamayıb.
Ümumilikdə isə Meyson “qırmızı şeytanlar”ın heyətində 129 oyuna çıxıb, 35 qol vurub, 12 məhsuldar ötürmə verib.
Qrinvuda qarşı cinayət işinə 2023-cü ilin fevralında xitam verilsə də, o, komandanın məşqlərindən və oyunlarından uzaqlaşdırıldığı üçün futboldan kənarda qalmalı olub. Futbolçu, onu zorlamada ittiham edən qadından uşaq sahibi – ata olub.
Bu xoşagəlməz məsələ ilə bağlı daxili təhqiqatına yekun vurmuş “Mançester Yunayted” Qrinvudla əməkdaşlığına qarşılıqlı surətdə xitam verdiyi haqda qərarını açıqlamışdı. Öz növbəsində, təqsirini dərk etmiş Qrinvud “qırmızı şeytanlar”ın rəhbərliyinin müvafiq qərarı ilə razılaşıb. Gənc futbolçunun karyerasını “Mançester Yunayted”dən kənarda davam etdirməsi daha düzgün hesab edilib.
Beləliklə, Qrinvud 2023/2024 mövsümünü icarə əsasında “Xetafe”də keçirib. Tərəflər arasındakı müqavilə 2024-cü ilin iyun ayının sonuna qədər qüvvədəydi. Transfer hüquqlarının məxsus olduğu “Mançester Yunayted”lə isə Qrinvudun 2025-cilin iyun ayının sonuna qədər müqaviləsi var.
Qrinvud “Xetafe”nin heyətində 36 oyuna çıxıb, 10 qol vurub və 6 məhsuldar ötürmə verib.
