“Napoli”dən icarə əsasında “Qalatasaray”a qoşulmuş nigeriyalı mərkəz hücumçusu Viktor Osimhen bu barədə fikrini açıqlayıb.
Arena.az xatırladır ki, Osimhen 2024/2005-ci illər mövsümünün sonuna qədər “Qalatasaray”ın uğurları üçün çalışacaq.
“Burada olmaqdan çox şadam, buradakı ab-hava heyrətamizdir. Tezliklə meydana çıxıb oynamaq istəyirəm. Mən Dris (Mertens) ilə oynamışam və o, mənə çox kömək edib. Mən bura gəlməmişdən əvvəl də onunla danışmışam. Onunla meydana çıxmaq intizarındayam.
Belə bir vaxtda bura gəlmiş azarkeşləri görəndə çox sevindim. Mən vurduğum qollarla sizi dəli etmək və adımı hayqırtmaq istəyirəm”, “Mundo Deportivo” nəşri Osimhendən sitat gətirir.
Xatırladaq ki, Osimhen daha əvvəl mövsüm üçün “Napoli”nin heyətindən kənarlaşdırılıb. “Napoli” komandanın hücum xəttini gücləndirmək üçün yay transfer pəncərəsinin sonlarında belçikalı mərkəz hücumçusu Romelu Lukakunu transfer edib.
Viktor Osimhen “Napoli”yə 2020-ci ilin sentyabrında 75 milyon avro məbləğ müqabilində “Lill”dən keçib. Nigeriyalı hücumçunun Neapol təmsilçisi ilə müqaviləsi 2026-cı ilin iyun ayının sonuna qədər qüvvədədir.
2023/2024-cü illər mövsümündə Osimhen “Napoli”nin heyətində bütün yarışlarda 32 oyuna çıxb, 17 qol vurub, 4 məhsuldar ötürmə verib. Osimhenin “Napoli”nin heyətində çıxışının ümumi mənzərəsi isə belədir: 133 oyun, 76 qol, 18 məhsuldar ötürmə.
Osimhen “Napoli” ilə 2022/2023-cü illər mövsümündə İtaliya A Seriyasının qalibi olub. Həmçinin nigeriyalı hücumçu həmin mövsümdə 26 qolla yarışın ən sərrast futbolçusu və mövsümün oyunçusu adını qazanıb.
Viktor Osimhen 2017-ci ilin iyununda debüt etdiyi Nigeriya yığmasının heyətində 35 oyuna çıxıb, 21 qol vurub, 11 məhsuldar ötürmə verib. Osimhen Nigeriyanın U-17 yığması ilə 2015 Dünya Kubokunun, U-23 yığması ilə 2015 Afrika Kubokunun qalibi olub.
“Transfermarkt” internet-portalı 25 yaşlı nigeriyalı hücumçunun transfer dəyərini 100 milyon avro məbləğində qiymətləndirir.
