Meloni G7-nin Rusiya aktivləri ilə bağlı siyasi razılaşma əldə etdiyini açıqlayıb

Yeddilik Qrupunun (G7) liderləri sammitdə Rusiyanın aktivlərinin Ukrayna üçün istifadəsi ilə bağlı siyasi razılığa gəliblər. Bizimyol.info xəbər verir ki, bunu sammitin birinci günü başa çatdıqdan sonra mətbuata açıqlamasında İtaliyanın baş naziri Giorgia Meloni deyib. O, izah edib ki, söhbət müsadirədən deyil, Kiyevə verilən kredit zəmanəti altında hazırda dondurulmuş Rusiya aktivlərindən yatırılan gəlirdən istifadə edilməsindən gedir. “Biz Ukraynaya kredit sistemi vasitəsilə ilin sonuna qədər 50 milyard dollar məbləğində maliyyə dəstəyi göstərmək üçün siyasi razılığa gəldik. Bu, müsadirə deyil, toplanmış faizdən istifadə etməklə”, - deyə Meloni bildirib. O, aydınlaşdırıb ki, Aİ-nin bu məsələ ilə bağlı artıq qəbul etdiyi qərarlar nəzərə alınmaqla, aktivlərin “texniki baxımdan” istifadəsi sxemi indi tezliklə müəyyən edilməlidir. "Bu nəticə heç də açıq deyildi və mən bunu təklif edərək qəbul etdirə bildiyim üçün xüsusilə fəxr edirəm", - deyə Meloni əlavə etdi. Avropa İttifaqı, Kanada, ABŞ və Yaponiya xüsusi hərbi əməliyyata başlayandan sonra Rusiyanın təxminən 300 milyard dollarlıq aktivlərini dondurub. Bunlardan təxminən 5-6 milyard dollar ABŞ-da yerləşir və əksəriyyəti Avropada, o cümlədən Belçikadakı beynəlxalq "Euroclear"da (burada 210 milyard dollar saxlanılır) yerləşir. Avropa Komissiyası (AK) daha əvvəl bloklanmış Rusiya fondlarından əldə edilən gəlirlərin Kiyevə yardım göstərmək üçün istifadə edilməsi təklifini təsdiqləyib. ABŞ prezidenti Co Bayden aprelin sonunda Ukrayna, İsrail və Tayvana əlavə böyük hərbi yardımı, habelə Rusiyanın ABŞ-da dondurulmuş aktivlərinin müsadirəsini nəzərdə tutan qanun layihələri paketini imzalayıb. Ukraynaya Rusiya aktivlərindən əldə edilən gəlirlə təminatla kredit vermək ideyası G7 ölkələrini buna inandıran ABŞ-a məxsusdur. Mətbuatın yazdığı kimi, onların heç də hamısı buna hazır deyildi. Xüsusilə Almaniya, İtaliya, Fransa və Yaponiya buna qarşı çıxdı. Rusiya Xarici İşlər Nazirliyinin rəsmi nümayəndəsi Mariya Zaxarovanın sözlərinə görə, Moskva Qərbdəki aktivlərinin müsadirəsi üçün dərhal cavab addımları atacaq. O, Qərbin Rusiyanın dondurulmuş aktivlərindən əldə edilən gəlirləri Ukraynanın xeyrinə istifadə etmək niyyətini kin və cinayət adlandırıb. Qadir, Bizimyol.info

• Rusiya
• Ukrayna
• G7
• siyasi
• rəsmi