Avropa Komissiyasının rəhbəri Ursula fon der Leyen bildirib ki, Ukrayna bu ilin iyulunda Rusiyanın dondurulmuş aktivlərindən 1,5 milyard avro gəlir əldə edəcək. Bu vəsaitlər aşağıdakı kimi bölüşdürüləcək: 90%-i ölkənin müdafiə ehtiyaclarına, 10%-i isə yenidənqurma işlərinə yönəldiləcək. Bu qərar qarşıdan gələn G7 sammitində müzakirə olunacaq.
Turkustan.az xəbər verir ki, bundan əlavə, Berlində keçirilən Ukraynanın yenidən qurulması üzrə forumda fon der Leyen iyunun sonunda Ukrayna üzrə Fond çərçivəsində Kiyevə daha 1,9 milyard avro maliyyə yardımı ayrılacağını açıqlayıb. Bu pul islahatlara və investisiya proqramlarına dəstək üçün istifadə olunacaq. AK rəhbəri onu da bildirib ki, enerji sistemini dəstəkləmək üçün Kiyevə əlavə min elektrik generatoru və 8 minə yaxın günəş paneli tədarük ediləcək.
Bundan əvvəl, mayın 21-də Aİ Şurası Xosep Borrelin immobilizasiya olunmuş Rusiya aktivlərindən əldə edilən gəlirin 90%-nin Ukraynaya hərbi yardıma, 10%-nin isə ölkənin yenidən qurulmasına ayrılması təklifini təsdiqləyib. Məlumat verilib ki, vəsaitin istifadəsi ilə bağlı yekun qərar hələ verilməyib.
Ukraynada xüsusi əməliyyat başlayandan sonra Aİ və G7 ölkələri Rusiyanın təxminən 300 milyard avro dəyərində valyuta ehtiyatlarının təxminən yarısını dondurub, bunun da 200 milyard avrosu Aİ-də Belçikanın Euroclear şirkətinin hesablarındadır. Moskva bu hərəkətləri beynəlxalq hüququn pozulması kimi pisləyib və aktivlərin dondurulmasını oğurluq adlandırıb.
Eltac Zülfüqaroğlu/Turkustan.az
