NATO Soyuq Müharibədən bəri ən böyük hərbi təlimini başa vurur.
Modern.az Almaniya mətbuatına istinadən xəbər verir ki, yanvarın sonlarında başlayan “Sabit Müdafiəçi” manevrlərinə 90 mindən çox hərbçi, 50-dən çox gəmi, 1100-ə yaxın döyüş maşını və 80-dən çox döyüş təyyarəsi cəlb olunub.
Manevrlər zamanı alyansın şərq sərhədinin müdafiəsi ssenarisi, o cümlədən Rusiya Federasiyasının Ukraynaya tammiqyaslı işğalından sonra yaradılmış alyansın müdafiəsi üçün yeni regional planlar işlənib.
NATO-nun böyük manevrlərinin bir hissəsi olaraq, Almaniya Ordusunun ayrı-ayrı manevrləri baş tutub. 12.000-dən çox hərbçinin yerləşdirilmə yerlərindən şərqdə yerləşdirilə biləcək ərazilərə köçürülməsi həyata keçirilib.
Bundesverin baş müfəttişi Karsten Breyerin sözlərinə görə, Almaniya ordusu manevrlər zamanı döyüş qabiliyyətini sübut edib. Alyans 1988-ci ildə 125 000-dən çox əsgərin iştirakı ilə müqayisə edilə bilən miqyaslı son təlimlərini keçirib.
