Özbəkistana müəyyən məhsulları Aİ-yə rüsumsuz göndərmək imkanı verən GSP Plus statusu daha 4 il müddətinə uzadılıb. Avropa bazarına 6 min növdən çox mal ixracı vergidən azad olmağa davam edəcək.
Publika.az xəbər verir ki, bu barədə Aİ-nin Özbəkistandakı səfiri Şarlotta Adrian mətbuata açıqlama verib.
O bildirib ki, 10 aprel 2021-ci ildə qüvvəyə minən və bu ilin sonunda başa çatacaq bəzi məhsulların Özbəkistanın Avropa ölkələrinə rüsumsuz ixracına icazə verən status, Aİ tərəfindən 31 dekabr 2027-ci ilə qədər uzadılıb.
“GSP Plus (GSP+) statusu 448 milyon avropalı istehlakçıya daha asan çıxış təmin etməklə və əməkdaşlığı daha sıx inkişaf etdirməklə Özbəkistanda özəl sektorun inkişafına güclü töhfə verir. Özbəkistandan Aİ-yə GSP meyarlarına cavab verən məhsul ixracı 2019-cu ildə 93 milyon avro, 2022-ci ildə isə 450 milyon avro oldu”.
Özbəkistanın İnvestisiya Sənaye və Ticarət nazirinin müavini Badriddin Abidov bəyan edib ki, Aİ-nin Özbəkistanın GSP Plus statusunun müddətinin uzadılması barədə qərarı onun ölkəsində aparılan hərtərəfli islahatların beynəlxalq səviyyədə təqdir olunduğunun göstəricisidir.
