Apple şirkətinin Kaliforniyadakı Cupertino şəhərciyində təqdimat tədbiri keçirilib.
Marja.az xəbər verir ki, Şirkətin baş icraçı direktoru Tim Kuk burada etdiyi çıxışda təqdimatın Apple-ın ilin ən mühüm hadisələrindən biri olduğunu və yeni smartfonlar, saatlar və simsiz qulaqlıqların təqdim ediləcəyini bildirib.
Tədbirdə verilən məlumata görə, Apple Watch Series 10 əvvəlki modellərlə müqayisədə daha incə dizayna və daha böyük ekrana sahibdir.
Bundan əlavə, 30 dəqiqə ərzində 80 faizə qədər enerji ilə doldurula bilən yeni model 18 saatlıq batareya ömrünə sahibdir və 50 metrə qədər suya davamlıdır.
Apple Watch Series 10 telefon zənglərini yaxşılaşdırmaq üçün fon səs-küyünü "boğur" və istifadəçiləri yuxu apnesi (tənəffüsün dayanması və təkrar-təkrar başladığı yuxu pozğunluğu) barədə xəbərdar edə bilir.
Qiymətləri 399 dollardan başlayan yeni modellər üçün bu gündən ilkin sifarişlər verilə bilər.
AirPods 4
Apple tərəfindən təqdim edilən yeni simsiz qulaqlıq seriyası AirPods 4 ətraf mühitdəki səs-küyü azaltmağa kömək edə biləcək fərdiləşdirilmiş məkan səsinə və xüsusiyyətlərə sahibdir.
AirPods 4-ün şarj qutusu əvvəlki modellərlə müqayisədə daha kiçik dizayna sahibdir və USB-C ilə uyğunlaşdırılıb.
Yeni simsiz qulaqlıq AirPods 4 129 dollara, aktiv səs-küyün ləğvi funksiyası olan qulaqlıq isə 179 dollara satışa təqdim ediləcək.
Apple-ın əvvəllər buraxdığı AirPods Pro 2, eşitmə ilə bağlı üç yeni xüsusiyyətə sahibdir.
iPhone 16
Şirkətin iPhone 16 modeli "Apple Intelligence" üçün sıfırdan hazırlanıb. iPhone 16 və iPhone 16 Plus olmaqla iki ölçüdə satışa çıxarılacaq smartfonlar böyük məhsuldar süni intellekt modellərini idarə etmək üçün optimallaşdırılmış yeni A18 çipinə sahibdir.
Yeni modellərdə kameraya bir kliklə girişi təmin edən idarəetmə düyməsi (Camera Control) və barmağınızla müxtəlif kamera xüsusiyyətlərini tənzimləmək imkanı var.
Avtomatik fokuslanma və zəif işıq şəraitində daha çox işıq tutma qabiliyyətini təmin edən yeni ultra geniş 48 meqapiksellik kamera da yeni modelin xüsusiyyətləri arasındadır.
iPhone 16 799 dollardan, iPhone 16 Plus isə 899 dollardan başlayacaq.
Apple 16 Pro və 16 Pro Max smartfonlarır əvvəlki modellərdən daha böyükdür və kənarları daha incədir. iPhone 16 Pro modellərində A18 Pro çipi olacaq. A18 Pro çipi həmçinin yeni kamera xüsusiyyətlərini gücləndirəcək.
iPhone 16 Pro Max-ın şirkətin ən yaxşı batareya ömrünə malik smartfonu olduğu bildirilib. iPhone 16 Pro 999 dollardan, 16 Pro Max 1199 dollardan başlayan qiymətlərlə satışa çıxarılacaq.
Apple-ın təqdim etdiyi yeni məhsullar sentyabrın 20-dən etibarən satışa çıxarılacaq.
