“İsrail və Fələstinin HƏMAS hərəkatı Qəzza zolağında atəşkəs əldə etməyə yaxındır”.
Yeniavaz.com xəbər verir ki, bu barədə CNN İsraildəki mənbəsinə istinadən məlumat yayıb.
Mənbənin sözlərinə görə, İsrail və HƏMAS sazişi bağlamaq ərəfəsindədir.
“İsrail hesab edir ki, HƏMAS-ın son cavabı tərəflərə razılığa gəlmək üçün ətraflı danışıqlara başlamağa imkan verəcək”, - CNN mənbədən sitat gətirib.
Mətbuat orqanı, bununla belə, sövdələşmənin taleyinin hələ həll olunmadığını yazıb.
Qeyd edək ki, daha əvvəl İsrailin Baş naziri Benyamin Netanyahunun ofisi və Mossad kəşfiyyat xidməti birgə bəyanat yayaraq , İsrail tərəfinin vasitəçilər vasitəsilə HƏMAS nümayəndələrindən girov müqaviləsi ilə bağlı cavab aldıqlarını bildiriblər.
Mayın 31-də ABŞ prezidenti Co Bayden Qəzzada üç mərhələdən ibarət olan sülh nizamlanmasına dair yeni saziş layihəsinin şərtlərini açıqlayıb.
İyunun 11-də HƏMAS və “İslami Cihad” qruplaşması təşəbbüsə cavabın Qətər və Misirdən olan vasitəçilərə ötürüldüyünü elan edib və anklavda müharibəni dayandırmaq üçün razılığa gəlmək üçün müsbət hərəkətlərə hazır olduqlarını bildiriblər. ABŞ, Misir və Qətər də öz növbəsində atəşkəs təklifi ilə bağlı şərhlərin alındığını təsdiqləyib və Qəzzada münaqişə tərəfləri arasında razılıq əldə olunana qədər vasitəçilik səylərini davam etdirəcəklərini vəd ediblər. İsrail hakimiyyəti əvvəllər dəfələrlə Baydenin təklifini dəstəklədiklərini və razılaşmanın qarşısındakı bütün maneələrin yalnız HƏMAS nümayəndələri tərəfindən yaradıldığını bildirib.