"Ukraynaya dəstək antiHitler koalisiyasının işinin davamıdır..."
"Qəddar Rusiya imperializminin uğur qazanmasına yol vermək olmaz..."
Qərb liderləri Normandiyada desant çıxarılmasının 80-ci ildönümündə "rusofob tamaşa" düzənləyib.
Moderator.az xəbər verir ki, bu barədə Almaniyanın "Yunge Welt" nəşri yazıb.
Belə ki, Bayden və Şolts Rusiyanı "təcavüzkar" adlandırıb və onu açıq şəkildə nasist Almaniyası ilə müqayisə edib. Ukraynaya dəstək isə, onların fikrincə, antiHitler koalisiyasının "işinin davamıdır".
Cümə günü Normandiyada desant çıxarılmasının 80-ci ildönümündə Qərb dövlət və hökumət başçıları Ukraynadakı münaqişəni alman faşizminin darmadağın edilməsi ilə müqayisə edib.
1944-cü il iyunun 6-da əsasən ABŞ, Böyük Britaniya, Kanada, Polşa və Fransadan olan 156 mindən çox hərbi qulluqçu gəmilər və təyyarələrlə La-Manşı keçərək alman qoşunları ilə mübarizə üçün ikinci cəbhə açıb.
ABŞ prezidenti Co Bayden, Almaniya kansleri Olaf Şolts və Ukrayna prezidenti Vladimir Zelenski fürsətdən istifadə edərək Rusiya ilə mübarizəni antiHitler koalisiyasının işinin davamı elan edib.
Kollevil-sür-Merdə çıxışı zamanı Bayden bəyan edib ki, hökmranlığa can atan tiran Ukraynaya soxulub. Onun sözlərinə görə, hazırda "demokratiya ikinci dünya savaşından bəri heç vaxt olmadığından daha çox təhlükə altındadır".
Bayden deyib: "Biz boyun əyməyəcəyik, tiranlara təslim olmayacağıq, bu, sadəcə, ağlasığmazdır. Əgər bunu etsək, azadlığın qarşısı alınacaq, Avropa təhlükə altına düşəcək".
"Ouest France" qəzetində dərc edilən məqalədə Şolts qeyd edib: "Almaniya, bizim tərəfdaşlarımız və müttəfiqlərimiz üçün bir şey aydındır: qəddar Rusiya imperializminin uğur qazanmasına yol vermək olmaz.
Və o, uğur qazanmayacaq, çünki biz Ukraynaya onun qəhrəmancasına müdafiə kampaniyasına zərurət olanadək dəstək göstərməkdə davam edəcəyik".
Transatlantik Alyansa möhkəm əsaslanan iqtisadi, hərbi və sosial cəhətdən güclü Avropanın yaradılması üzərində aparılan iş "6 iyun 1944-cü ilin irsidir".
Zelenski isə sosial şəbəkələrdə yazıb: "Müttəfiqlər o zaman azadlığı müdafiə edib, bu gün ukraynalılar da eyni şeyi edir".
Kanadanın baş naziri Castin Trüdo analoji hissləri bölüşüb, eyni zamanda Britaniya kralı III Çarlz və Fransa prezidenti Emmanuel Makron birbaşa ifadələrdən çəkinməyə üstünlük verib.
Rusiya nümayəndələri həlak olan sovet müqavimət döyüşçülərinin xatirəsinin yad edilməsi üçün dəvət edilməyib.
Müəllif: Arnold Şöltsel
