Amerikanın “Politico” qəzetinin Avropa nəşri qeyd edir ki, Aİ ölkələri Rusiyanın enerji ixracına, əsasən mayeləşdirilmiş təbii qaza (LNG) qarşı yönəlmiş 15-ci sanksiyalar paketinin hazırlanmasına yanvar ayından sürətləndirilmiş templə başlayacaqlar.
Nəşrin mənbələri vurğulayır ki, 15-ci paketdə Avropa Komissiyası Aİ ölkələrinin Rusiya LNG-ni almaq imkanlarını daha da məhdudlaşdırmağa çalışacaq. Bundan əlavə, Brüssel Rusiyanın neft və neft məhsullarını daşıyan tanker donanmasına qarşı sanksiyaları sərtləşdirmək niyyətindədir.
Aİ Rusiyaya qarşı son, 14-cü sanksiyalar paketini iyun ayında təqdim edib. Buraya 116 hüquqi və fiziki şəxs daxil olub. Aİ həmçinin Rusiyadan LNG-nin Avropa limanları vasitəsilə tranzitinə də qadağa qoyub.
Rusiya bu məhdudiyyətləri qanunsuz hesab edir. Prezident Vladimir Putin deyib ki, Qərb ölkələri sanksiyalar vasitəsilə Rusiya iqtisadiyyatını tükəndirməyə və “ölkə daxilində ictimai-siyasi gərginliyi artırmağa” çalışsalar da, bu, heç bir nəticə verməyib.
