Hindistanın hüquq-mühafizə orqanları Nepal vətəndaşlarını saxta Hindistan pasportları ilə Azərbaycana göndərən qrupun izinə düşüb.
Hindistan mətbuatı yazır ki, 27 yaşlı Nepal vətəndaşı Qanşyam Kxadka avqustun 13-də Dehli hava limanında belə pasportla Bakıya uçmaq istəyərkən saxlanılıb.
Məlum olub ki, saxta pasportu ona özünü “Vicay” kimi təqdim edən hindistanlı agent satıb. Miqrasiya rəsmiləri Nepal ləhcəsi ilə danışan “Hindistan vətəndaşı”ndan şübhələnib və onun pasportunu diqqətlə yoxlamaq qərarına gəliblər.
Dindirilmə zamanı nepallı bildirib ki, bu ilin may ayında o, internet vasitəsilə Vicayla əlaqə saxlayıb və o, Azərbaycanda işləmək üçün ona Hindistan pasportu almağa kömək edə biləcəyini deyib. Kişi bu təkliflə razılaşaraq Dehliyə gəlib və sənədi alıb.
Məlum olub ki, nepallılar iyun və avqust aylarında Küveyt və Honq-Konqa səfər edərək saxta pasportu sınaqdan keçirib. Bu uğurdan ruhlanan o, pul qazanmaq üçün Azərbaycana uçmaq qərarına gəlib. Lakin Nepal vətəndaşının Dubay vasitəsilə Bakıya gəlmək cəhdi onun həbsinə səbəb olub.
Hazırda polis şəbəkənin xidmətlərindən neçə nəfərin saxta pasport hazırlamaq üçün istifadə etdiyini müəyyənləşdirməyə çalışır.
Hindistan mediası belə saxta sənədlərin təkcə Nepal deyil, Banqladeş vətəndaşlarına da satıldığını yazır. Bu yaxınlarda onlardan biri Mumbay beynəlxalq hava limanında saxlanılıb. Məlum olub ki, o, əvvəllər də saxta pasportla Səudiyyə Ərəbistanına gedib.
Şahanə Rəhimli
Musavat.com
