21 yaşadək futbolçulardan ibarət Azərbaycan millisinin (U-21) yarımmüdafiəçisi Murad Vəliyev “Nomme Yunayted”də növbəti matçına çıxıb.
Arena.az xəbər verir ki, Estoniya çempionatında 2024-cü il mövsümünün 23-cü turunun oyunları keçirilib.
“Nomme Yunayted” bu turda səfərdə “Tammeka” ilə qarşılaşıb. Futbolçumuzun komandası bu oyundan heç-heçə ilə ayrılıb – 1:1.
“Nomme Yunayted”ə bu ilin fevral ayında qoşulmuş Vəliyev bu oyuna start heyətdə balayıb və 62-ci dəqiqədə əvəzlənib. Əvvəlki turlarda 1 qol və 1 məhsuldar ötürmə müəllifi olmuş azərbaycanlı futbolçu bu dəfə də fərqlənib. Komandasının yeganə qolunu məhz Murad vurub. O, 39-cu dəqiqədə hesabı açıb. Amma “Nomme Yunayted” bu üstünlüyü 72-ci dəqiqədə əldən verib.
Qeyd edək ki, Murad Vəliyev müqavilə ilə Estoniyanın “Levadiya” klubuna məxsusdur. Sağ vinger olan 22 yaşlı azərbaycanlı futbolçu 2024-cü ilin 31 dekabrına kimi “Nomme Yunayted”də icarə əsasında forma geyinəcək. O, bu komandanın heyətində 22 oyuna çıxıb və 2 qola, 1 avtoqola imza atıb.
Murad Latviyanın “Kalev” klubunun yetirməsidir. O, Almaniyanın “Rozenhaym” və “Bad Aiblinq” klublarının aşağı yaş qrupları üzrə komandalarında da oynayıb. 2022-ci ilin yanvar ayından “Levadiya”da çıxış edən vinger bu klubun əsas komandasında 46 oyun keçirib, 2 qol və 3 məhsuldar ötürmə ilə yadda qalıb.
Murad Estoniyanın U-16 və U-18 yığmalarında oynasa da, 2022-ci ildən Azərbaycanın U-21 millisinə dəvət alır. O, yığmamızda 12 oyun keçirib və 1 qola imza atıb.
Sonda onu da qeyd edək ki, 2000-ci ildə yaradılmış “Nomme Yunayted” bu mövsüm tarixində ilk dəfə Estoniya çempionatında çıxış edir. Sözügedən komanda 23 turdan sonra 12 xalla 10 iştirakçı arasında sonuncu pillədə qərarlaşıb.
