Birləşmiş Millətlər Təşkilatının (BMT) Humanitar Məsələlər üzrə Koordinasiya Ofisinin (OCHA) məmuru Yasmina Querda 7 oktyabr 2023-cü ildən Qəzzada 200-dən çox humanitar yardım işçisinin öldürüldüyünü və bunun təhlükəsiz ərazi olmadığını bildirib.
Yasmina Querda, BMT-nin Cenevrə ofisinin həftəlik mətbuat konfransında Qəzzada 3 aylıq vəzifəsindən sonra şahidi olduqlarını mətbuat mənsubları ilə bölüşüb.
Qəzzada vəziyyətin rəqəmlərlə ölçülə bilməyəcək qədər pis olduğunu bildirən Querda, bir çox insanın evlərindən didərgin düşdüyünü, qəzzalıların qida, sığınacaq, sağlamlıq və digər ehtiyaclarını qarşılaya bilmədiyini bildirib.
"Qəzzada mən həyatımın sonuna qədər məni təqib edəcək hekayələri eşitdim və gördüm",-deyə Querda bildirib.
Ehtiyacı olanlara humanitar yardımın çatdırılmasında yaşanan çətinliklərə diqqət çəkən Querda, keçid məntəqələrində saatlarla gözlədildiklərini və bunun koordinasiyada çətinliklər yaratdığını bildirib.
