Həyatın "dad"ını çıxarın... Şəkərdən imtina etdikdə psixoloji və fiziki hansı müsbət dəyişikliklər olur?

Şəkər çoxumuzun həyatında əvəzolunmaz qidalardan biridir. Bəzilərimiz şəkərsiz həyatı təsəvvür belə edə bilmirik. Tutaq ki, şəkəri həyatımızdan çıxardıq. O zaman bədənimizdə nə baş verəcək? Su içmək ən əsas ehtiyaclarımızdan biri olduğu kimi, şəkərli bir şey istehlak etmək də vacib ehtiyaclarımız arasındadır. Şəkərsiz ilk 24 saatda qan şəkəri düşür. Daha sonra mədəaltı vəzi glikogeni parçalayaraq, aşağı qan şəkəri səviyyəsini tənzimləyən bir hormon olan qlükaqon ifraz edir. Bədənimizdə şəkərin saxlanması bizə lazım olan enerjini yaradır. İkinci gün şəkər istəkləri yaranır, çünki özünüzü yorğun hiss edirsiniz və vücudunuz daim yeni enerji mənbələri yaratmalıdır. Bu vaxt bədəndəki zülallar şəkərə çevrilir, yağlar isə enerji yaratmaq üçün ketonlara parçalanır. Bu, yorğunluq, baş ağrıları və hətta şəkər istəyinə səbəb olur. Üçüncü gün şəkər qəbulunun azalması səbəbindən ağızdan pis qoxu gəlməyə başlayır. Bu pis qoxulu nəfəs bir neçə gündən bir neçə həftəyə qədər davam edə bilər. Beş ilə on gün arasında damaq şəkərə qarşı daha həssas olur. Onuncu həftədə dərinizin daha sağlam göründüyünü hiss etməyə başlaya bilərsiniz. Çünki şəkər sızanaqların əmələ gəlməsinə səbəb olan bir maddədir və onun çatışmazlığı bu vəziyyətlə qarşılaşmamaq deməkdir. Şəkərsiz bir ilin sonunda yuxu keyfiyyətiniz nəzərəçarpacaq dərəcədə yaxşılaşacaq. Dietoloq Aynurə Məmmədova Bizimyol.info xəbər portalına açıqlamasında bildirib ki, şəkər gündəlik həyatımızda geniş istifadə olunan qidaların tərkib hissəsidir. “Şirniyyat və qazlı içkilərdən tutmuş şirələrə və şəkərlə şirinləşdirilmiş əlavələrə qədər istehlak etdiyimiz geniş çeşiddə qidalarda olur. Son illərdə şəkərdən imtina sağlamlıqlarını yaxşılaşdırmaq istəyən insanlar arasında məşhur bir tendensiyaya çevrilib. Şəkərdən imtina etməyin ümumi sağlamlığınız üçün əhəmiyyətli faydaları ola bilər. Baş verə biləcək ilk dəyişiklik, piylənmə riskinin azalmasıdır. Şəkərdə çoxlu sayda boş kalori var ki, bu da artıq çəkiyə səbəb ola bilər. Şəkərdən qaçaraq, kalori qəbulumuzu azalda bilərik”-deyə dietoloq bildirib. Şəkərdən imtina etsək... Şəkərdən imtina etmək ürək-damar sağlamlığını dəstəkləyir. Şəkərdən qaçınmaq ürək sağlamlığını yaxşılaşdıran xolesterolu və qan təzyiqini azaltmağa kömək edə bilər. Şəkər enerji və yaxşı əhval-ruhiyyənin müvəqqəti artmasına səbəb ola bilər, lakin siz özünüzü tez-tez yorğun və əsəbi hiss edə bilərsiniz. Şəkər istehlakı ilə dəri vəziyyəti arasında əlaqə çoxdan məlumdur. Şəkər sızanaqlara və dərinin vaxtından əvvəl qocalmasına kömək edə bilər. Həddindən artıq şəkər qəbulundan qaçaraq, dərimizin vəziyyətini yaxşılaşdıra və daha sağlam görünüş əldə edə bilərik. Pəhrizdə şəkərin çox olması həzm sistemini poza bilər, qəbizlik və şişkinlik kimi problemlərə səbəb ola bilər. Şəkərdən imtina etmək və daha sağlam, liflə zəngin pəhriz yemək həzmi yaxşılaşdırmağa kömək edə bilər. Şəkərdən imtina etdikdən sonra ilk günlər və ya həftələr çətin ola bilər, çünki bədən dəyişdirilmiş pəhrizə alışa bilər. Bəzi insanlar baş ağrısı, əsəbilik, yorğunluq və s. kimi simptomplarla qarşıla bilər. Ancaq bu simptomlar adətən müvəqqəti xarakter daşıyır və zamanla yox olur. Şəkərdən bir anda imtina etmək əvəzinə, onun istehlakını tədricən azaltmaq tövsiyə olunur. Qəhvə və ya çayınıza əlavə olunan şəkərin miqdarını azaltmaqla başlayın, sonra şirniyyatları və şəkərli içkiləri pəhrizinizdən tədricən çıxarın. Bu, daha az şəkərə alışmağınıza və prosesin daha davamlı olmasına kömək edəcək. Qida etiketlərini oxuyun. Qidalarda gizli şəkərdən qaçmağın ən yaxşı yollarından biri etiketləri oxumaqdır. Bir çox qidada fruktoza, qarğıdalı siropu və saxaroza kimi müxtəlif adlar altında əlavə şəkər var. Ehtiyatlı olun və şəkərin miqdarı az olan və ya şəkər əlavə olunmayan qidaları seçməyə çalışın. Şirniyyatları təbii alternativlərlə əvəz edin. Şəkər əlavə edilmiş şirniyyatları istehlak etmək əvəzinə, onları təbii alternativlərlə əvəz etməyə çalışın. Giləmeyvə və ya dilimlənmiş ananas kimi meyvələr şirin istəklərinizi təmin edə və gözəl bir dad əlavə edə bilər. İradə Cəlil, Bizimyol.info