Cütlüklər arasında münasibətlərin korlanmasına müəyyən hallarda qadınlar səbəb olur. Qadınların bəzi davranışları kişilərin onlardan soyumasına və evdən uzaqlaşmasına səbəb olur.
Bəs kişiləri qadınlardan soyudan əsas davranış hansıdır?
Mövzu ilə bağlı Sfera.az-adanışan psixoloq Ləman Məmmədova bildirib ki, bəzən qadınlar kişilərin özlərindən muğayat ola bilməyəcəyini düşünərək, öz həyat yoldaşları ilə ana kimi davranır və onlarla uşaq kimi rəftar edirlər.
“Hər bir xanım ərinin həyatında yeganə qadına çevrilmək və daima aralarında isti münasibət olmasını istəyir. Amma bəzən qadınlar öz yersiz hərəkətləri ilə həyat yoldaşlarının pis davranışlarına məruz qalırlar. Onların ən böyük səhvi kişilərlə uşaq kimi rəftar etmələrindədir. Qadınlar elə düşünürlər ki, kişilər ailə həyatını idarə edə bilməzlər və onlar daima qadına möhtacdırlar. Kişilər isə sərbəstliyi xoşlayır və heç kimə tabe olmaq istəmirlər. Azadlıq və müstəqillik kişilərin ən əsas xüsusiyyətlərindən biridir. Buna görə də qadınlar kişilərlə uşaq kimi davranan zaman kişilər də qadınların əleyhinə tüğyan edirlər. Əsasən, ərlərini itirməmək və onları əldən verməmək qorxusu içində olan qadınlar həyat yoldaşları ilə ana kimi davranıb, onları özlərinə möhtac etmək istəyirlər. Qadınların fikrincə, belə olan zaman ərləri onlara möhtac olar və onsuz heçnə edə bilməzlər. Amma bunu edən zaman düşünmürlər ki, bir gün bütün oğlanlar analarından ayrılaraq müstəqil həyata addımlayırlar”.
Psixoloq qeyd edib ki, ərləri belə qadınları tərk edən zaman onlar psixoloji sarsıntı keçirirlər.
"“Axı mən anası kimi onun qeydinə qaldım, hər istəyini yerinə yetirdim” düşüncəsi ilə kişinin ayrılığı onları təəccübləndirir. Bu zaman səhvi özlərində yox, ərlərində axtarırlar. Qadın bu davranışı ilə yoldaşının məhəbbətini yox, nifrətini qazanır və onu evdən, ailədən uzaqlaşdırır. Kişilər hər yerdə öz sözlərinin keçməsini istəyirlər. Qadınlar kişiləri özlərinə möhtac edərək onlardan təşəkkür gözləyirlər. Lakin gözlənilənin tam əksi olur”.
Ülkər Abdurahmanlı
