“Paşinyan və komandası neçə ildir agentlərdən danışır? Bütün güc strukturları onların əlindədir, gücləri çatır, əllərindən alsınlar. Agentlər onların sıralarındadır. Onların bir qismi birbaşa maaş alır, digər hissəsi isə dolayı yolla agentdir. Azərbaycan açıq şəkildə bəyan edir ki, onlar Ermənistanın lideri Paşinyanın özünü bəyənirlər”.
KONKRET.az xəbər verir ki, bu sözləri “Mənim namusum var” müxalifət fraksiyasının lideri Hayk Mamicanyan bildirib.
O daha sonra fikirlərini belə davam etditib: “Paşinyan dövründə Ermənistan dünyada tək qaldı. ABŞ-nin dövlət katibi Antoni Blinken Nümayəndələr Palatasının Xarici Əlaqələr Komitəsində keçirilən dinləmələr zamanı bildirib ki, Ermənistana dəstəyi gücləndirmək üçün başqa nə lazımdırsa ediləcək.
Təbii ki, Ermənistanın təhlükəsizliyini təmin etmək üçün istənilən yardım çox vacibdir, lakin aprelin sonunda Avropa İttifaqının “Sülh Fondu”ndan Ermənistana yardımın göstərilməsi layihəsinin icrası zamanı baş verənlər barədə ilkin razılıq əldə olunub.
Macarıstan Azərbaycanın proqrama daxil edilməsini tələb edərək Ermənistanı dəstəkləmək qərarına veto qoyub. Bundan sonra xarici işlər naziri Macarıstana gedib və təəssüf ki, heç bir nəticə olmayıb. ABŞ-dan yardım almaq məsələsini müzakirə edərkən eyni problemlərin yaranmama ehtimalı nə dərəcədə yüksəkdir? Paşinyanın ABŞ-dan tələbi də polis mühafizəsinin yaradılmasına dəstək olsa, təəccüblənmərəm. Onun Ermənistandakı siyasi məhbuslar və məhkəmə sistemindəki problemlər barədə də danışmamağı xahiş etməsi də istisna deyil.
Ermənistan-Aİ münasibətləri kontekstində bizim hələ də bir fundamental sənədimiz var və o, Serj Sarkisyanla Avropa İttifaqı arasında imzalanmış Hərtərəfli və Genişləndirilmiş Tərəfdaşlıq Sazişidir. İndiyədək Aİ ilə münasibətlər Serj Sarkisyanın imzaladığı sazişdən kənara çıxmayıb. (2017-ci ildə İrəvan və Brüssel müxtəlif sahələrdə, o cümlədən ticarət-iqtisadi əlaqələrdə əməkdaşlığı inkişaf etdirməyə çalışan hərtərəfli və genişləndirilmiş tərəfdaşlıq sazişi imzalayıblar. O, 2018-ci ildə müvəqqəti tətbiq edilib və 2021-ci ildə rəsmi olaraq qüvvəyə minib).
Ermənistan-Türkiyə münasibətlərinin normallaşması məsələsi bizim üçün hər zaman vacib məsələlərdən biri olub, amma Ermənistanın o istiqamətdə işi yoxdur, Türkiyə sərhədi bağlayıb, Türkiyə də açmalıdır.
NATO-nu bölgədə Türkiyə təmsil edir və əgər kimsə NATO-nu Ermənistanda təhlükəsizliyin təminatçısı kimi görürsə, bu təşkilatın bölgədəki nümayəndəsi Türkiyədir.
Nikol Paşinyan Ermənistanı dünyanın ən müstəqil ölkəsinə çevirməyi bacardı, o qədər müstəqil ki, heç nə bizdən asılı deyil”.
Natiq Səlim,
KONKRET.az
