Premyer Liqa: “Qarabağ” “Neftçi”yə, “Kəpəz” “Sumqayıt”a qarşı

Bu gün futbol üzrə Azərbaycan çempionatında (Premyer Liqa) 2023/2024 mövsümünün 33-cü turunun oyunlarına start veriləcək.

Arena.az xəbər verir ki, ilk oyun günündə iki qarşılaşma keçiriləcək.

Turun açılış matçında “Kəpəz” “Sumqayıt”ı qəbul edəcək. Son turda hər iki komanda qalib gəlib. Xüsusilə Sumqayıtın eyniadlı təmsilçisi uğurlu seriya sayəsində hazırda turnir cədvəlində ikinci pillədə qərarlaşıb. 50 xalı olan komanda mövqeyini qorumaq üçün Gəncə təmsilçisinə mütləq qalib gəlməyə çalışacaq. Ötən tur elitadakı yerini təmin edən “Kəpəz” isə üst pillələrə çıxmaq üçün “Sumqayıt”la matçda xal və xallar qazanmaq arzusundadır.

“Kəpəz”lə “Sumqayıt” daha öncə 27 oyunda qarşılaşıblar. Bu oyunlarda gəncəlilər 7, sumqayıtlılar 11 qələbə qazanıblar, 9 heç-heçə qeydə alınıb. “Sumqayıt” son 6 matçda qol vurub. “Kəpəz” son 5 ev oyununda qələbə qazanmayıb.

Günün digər oyunu milli çempionatımızın daimi iki iştirakçısı – “Qarabağ”la “Neftçi” arasında baş tutacaq. İnqilab Məmmədovun idarə edəcəyi oyunda Ağdam klubu son turlardakı uğursuz gedişata son qoymağa çalışacaq. “Neftçi” isə avrokuboklara vəsiqə qazanmaq üçün əzəli rəqibini məğlub etmək məcburiyyətindədir. 71 xalı olan “Qarabağ” çempionluğu hələ bir neçə tur öncə təmin edib. “Neftçi” isə 50 xalla üçüncü sıradadır.

“Qarabağ” və “Neftçi” indiyə qədər çempionatda 94 oyunda üz-üzə gəliblər. Ağdam klubu indiyə qədər 40, paytaxt təmsilçisi 23 qələbə qazanıbsa, 31 görüş bərabərliklə bitib. “Neftçi” son 11 görüşdə qələbə qazanmayıb. “Qarabağ” ardıcıl 4 qarşılaşmada qalib gəlib.

Premyer Liqa
33-cü tur
4 may

“Kəpəz” – “Sumqayıt”
Hakimlər: Tural Qurbanov, Zöhrab Abbasov, Teymur Teymurov, Nicat İsmayıllı.
Hakim-inspektor: Asim Xudiyev.
AFFA nümayəndəsi: Asif Əliyev.
Tovuz şəhər stadionu, 16:30.

“Qarabağ” – “Neftçi”
Hakimlər: İnqilab Məmmədov, Namiq Hüseynov, Kamran Bayramov, Fərid Hacıyev.
Hakim-inspektor: Barış Şimşək.
AFFA nümayəndəsi: Elçin Mehtiyev.
Bakı. “Azersun Arena”, 19:30.

5 may

“Turan Tovuz” – “Zirə”
Hakimlər: Elçin Məsiyev, Elşad Abdullayev, Pərvin Talıbov, Kamal Umudlu.
Hakim-inspektor: Babək Quliyev.
AFFA nümayəndəsi: Mübariz Hüseynov.
Tovuz şəhər stadionu, 16:30.

“Araz-Naxçıvan” – “Sabah”
Hakimlər: Əliyar Ağayev, Akif Əmirəli, Rahil Ramazanov, Rəşad Əhmədov.
Hakim-inspektor: Munis Abdullayev.
AFFA nümayəndəsi: Bəhram Qurbanov.
Mərdəkan. “Dalğa Arena”, 19:00.

6 may

“Səbail” – “Qəbələ”
Hakimlər: Əli Əliyev, Cəmil Quliyev, Eyyub İbrahimov, Rəvan Həmzəzadə.
Hakim-inspektor: Vüsal Əliyev.
AFFA nümayəndəsi: Namiq Əliyev.
“Bayıl Arena”, 19:00.