Keniyada aprel ayında güclü yağışların səbəb olduğu daşqınlar nəticəsində azı 179 nəfər ölüb, daha 90 nəfər itkin düşüb.
Bu barədə hökumət sözçüsü İsaak Maiqua Mvaura məlumat verib.
“Dünən (30 aprel - red) davam edən daşqınlar daha 10 nəfərin ölümünə səbəb olub, bununla da ölkədə daşqın qurbanlarının sayı 179-a çatıb. Daha 20 nəfər itkin düşüb, bununla da ölkə üzrə itkin düşənlərin ümumi sayı 90 nəfərə çatıb”, - o sosial şəbəkədə yazıb.
Mvauranın sözlərinə görə, əlavə olaraq 125 nəfər daşqınlardan bu və ya digər şəkildə zərər çəkib. Həmçinin, 185 min Keniyalı evlərini tərk edərək təhlükəsiz yerlərə sığınmaq məcburiyyətində qalıb.
