ABŞ Rusiyanın heyfini Çindən almağa hazırdır

Dövlət katibi Antoni Blinken ABŞ-ın Rusiyaya ikili təyinatlı malların tədarükünü dayandırmayacağı təqdirdə Çinə qarşı məhdudlaşdırıcı tədbirlər görməyə hazır olduğunu açıqlayıb. O qeyd edib ki, bu mövzu Pekində Çin sədri Si Cinpin və xarici işlər naziri Van İ ilə danışıqlarda müzakirə olunub.
“Bugünkü müzakirələr zamanı mən ÇXR-in Rusiyanın Ukraynaya qarşı tə­cavüzünü gücləndirən komponentlərin tədarükü ilə bağlı ciddi narahatlığımızı təkrarladım. Əgər Çin tərəfdən heç bir tədbir görülməsə, biz hərəkətə keçməyə tam hazırıq”, - deyə cənab Blinken mət­buat konfransında bildirib. O xatırladıb ki, ABŞ bundan əvvəl də Çin şirkətlərinə qarşı sanksiyalar tətbiq edib. Konfrans ABŞ Dövlət Departamentinin “YouTube” kanalında yayımlanıb.
ABŞ dövlət katibinin sözlərinə görə, Çin Rusiyanın müdafiə sənayesi komp­leksinin yaradılması üçün istifadə etdiyi dəzgahlar və mikroelektronika, eləcə də digər ikili təyinatlı malların ən böyük tə­darükçüsüdür. O hesab edir ki, Çin Ru­siyaya yardımı davam etdirərkən Qərb ölkələri ilə yaxşı münasibətlərə can ata bilməz.
Antoni Blinkenin Çinə səfəri ərəfəsin­də “The Wall Street Journal” məqalə dərc edib və burada xüsusilə qeyd olunub ki, Rusiya-Ukrayna hərbi münaqişəsinin başlanmasından sonra Çin Rusiya Fe­derasiyasına elektron sxemlərin, təyyarə hissələrinin, maşın və maşın alətlərinin əsas təchizatçısına çevrilib. Çin bankları Rusiyaya kommersiya ixracatında əsas vasitəçilər kimi göstərilib. Nəşrin mən­bələri ABŞ-ın onlara qarşı sanksiyalar tətbiq etməyə hazırlaşdığını iddia edib.
Çin Xarici İşlər Nazirliyi nəşri şərh edərkən bildirib ki, Çin digər ölkələrlə bərabərlik və qarşılıqlı fayda əsasında normal ticarət-iqtisadi fəaliyyət göstər­mək hüququna malikdir. Cənab Blinkenlə görüşündə Van İ ABŞ-ı Çinin suverenliyi və təhlükəsizliyi ilə bağlı qırmızı xətləri keçməkdən çəkindirib.
S.ELAYXQ