Sahibkarın əmlakını zədələyən şəxslə bağlı qərar verildi

Ali Məhkəmədə özbaşınalıqda və əmlakı qəsdən məhv etmə və ya zədələmədə təqsirləndirilən Süleyman Ağayarovun barəsindəki qərardan dövlət ittihamçısı tərəfindən verilən kassasiya protest və zərərçəkmişin kassasiya şikayəti üzrə məhkəmə iclası başa çatıb.

Pravda.az-ın əldə etdiyi məlumata görə, hakim İlkin Rəcəbovun sədrliyi ilə keçirilən prosesdə qərar elan olunub.

Qərara əsasən, kassasiya protesti və kassasiya şikayəti təmin edilməyib.

İttihama görə, Süleyman Ağayarov və tanışı “Nüsrət” adlı şəxs qabaqcadan əlbir olan bir qrup şəxs halında 28 oktyabr 2021-ci il tarixdə, saat 11 radələrində Bakı şəhəri, Xəzər rayonu, Buzovna qəsəbəsi, dəniz kənarı ərazidə yerləşən “Delmar” hotelin yaxınlığındakı ərazidə zərərçəkmiş Gündüz İsmayılovun Buzovna bələdiyyəsi tərəfindən icarə müqaviləsi əsasında verilmiş torpaq sahəsində mövsümi kafe kimi fəaliyyət göstərən istirahət obyektinə gəliblər. Onlar orada kran avtomobilinin sürücüsünə qeyd olunan obyektdə taxta-şalban materiallarından hazırlanaraq quraşdırılmış istirahət otaqlarının sökülməsi barədə göstəriş veriblər. Sonra kranın sürücüsü qaldırıcı kranla istirahət zonasında quraşdırılmış 6 ədəd istirahət otaqlarını yerindən çıxartmaqla zədələyib. Həmin şəxslər bu hərəkətləri ilə zərərçəkmiş şəxsin 5574 manat məbləğində, yəni xeyli miqdarda maddi ziyan vurmaqla özbaşınalıq edib özgənin əmlakını qəsdən zədələyib.

Xəzər Rayon Məhkəməsinin hökmü ilə Süleyman Ağayarova 2 il 6 ay müddətinə azadlığın məhdudlaşdırılması (elektron qolbaq) cəzası təyin edilib. Birinci instansiya məhkəməsinin qeyd edilən hökmündən dövlət ittihamçısı apellyasiya protesti, zərərçəkmiş şəxsin nümayəndəsi isə apellyasiya şikayəti verib. Bakı Apellyasiya Məhkəməsi protesti təmin etməyib, şikayəti isə qismən təmin edib. Zərərçəkmiş şəxs tərəfindən verilmiş mülki iddianın maddi ziyanın tutulması hissəsində tam, mənəvi ziyanın tutulması hissəsində isə qismən təmin edilib. Belə ki, məhkumdan maddi ziyana görə 5574 manat, mənəvi ziyana görə 200 manat pulun tutularaq zərərçəkmiş şəxsə ödənilməsi qərara alınıb.

Kamal Məmmədov