Dünya Bankının (DB) hesabatına əsasən, bu maliyyə qurumunun iqlim maliyyələşdirməsi 2023-cü ildə rekord həddə çatıb və 29,4 milyard ABŞ dolları təşkil edib.
Hesabatda, həmçinin qeyd edilir ki, DB gələcəkdə təkcə iqlim dəyişikliyi ilə mübarizəyə ayrılan vəsaitin həcminə diqqət yetirməməyi planlaşdırır. DB, eyni zamanda, investisiyaların təsirini izləməklə problemə daha geniş yanaşmağı qarşıya mühüm vəzifə kimi qoyur. Layihələr sayəsində tullantıların həcmi azalır, hava daha təmiz olur, suyun keyfiyyəti və əhalinin sağlamlığı yaxşılaşır.
Bəs iqlim maliyyələşdirməsinin təmin etdiyi dəyişikliyin miqyası nə qədərdir? DB-nin hesabatında bu suala belə cavab verilir: “Maliyyə qurumu dünya ictimaiyyətinin sıfır emissiyaya nail olmasına və iqlim dəyişikliyinin təsirlərindən qorunmasına böyük diqqət yetirir. İqlim və inkişaf məsələlərini birlikdə həll etmək üçün DB ölkələrdə istixana qazı emissiyalarını azaltmaq üçün strategiyalar axtarır, digər yandan da mühüm yeni diaqnostik alət vasitəsilə – ölkələr üzrə iqlim və inkişaf hesabatları ilə davamlı inkişafı dəstəkləyir”.
20-dən çox ölkəni əhatə edən birinci belə hesabat göstərir ki, iqlim dəyişikliyi uzunmüddətli inkişaf məqsədlərinə çox ciddi təhlükə yaradır, lakin ölkələr böyük dəyişikliklərə razı olsalar, emissiyaları azalda bilərlər və onların iqtisadiyyatları böyüməyə davam edir. Belə keçidi həyata keçirmək üçün lazım olan maliyyə resursları orta hesabla ÜDM-in təxminən 1,4 faizini təşkil edir – özəl sektorun lazımi iştirakı ilə bu məbləğ kifayət qədər əlçatandır. Bununla belə, aşağı gəlirli ölkələrdə tələb olunan maliyyələşdirmə ÜDM-in 5 faizini keçə bilər ki, bu da yüksək gəlirli ölkələrdən daha çox dəstək, o cümlədən daha güzəştli maliyyələşdirmə tələb edəcək.
Dünya Bankı, həmçinin davamlı inkişafa nail olmaq və yoxsulluğa son qoymaqla yanaşı, qlobal istiləşmənin 2°C, imkan olarsa 1,5°C ilə məhdudlaşdırılmasında irəliyə doğru mühüm addımı təmsil edən yeni maliyyələşdirmə əməliyyatlarını Paris Sazişinin məqsədlərinə uyğunlaşdırmağı öhdəsinə götürüb. Bank qeyd edir ki, 2023-cü il iyulun 1-dən DB-nin bütün maliyyələşdirmə əməliyyatları bu öhdəliyə uyğundur.
“Bankın baş ofisində İqlim Dəyişikliyi ilə Mübarizə üzrə Maliyyə Nazirləri Koalisiyasının katibliyi fəaliyyət göstərir. 86 ölkənin maliyyə nazirliyini və 26 institusional tərəfdaşı birləşdirən bu koalisiya 2023-cü ildə Dünya Bankı və IMF-in yaz toplantıları zamanı yaradılıb. Onun əsas məqsədi iqlim dəyişikliyi və ədalətli keçidin iqtisadi gündəmdə əsas yer tutmasını gerçəkləşdirmək, ölkələrin üzləşdiyi strateji problemləri müzakirə etmək və strategiyaların həyata keçirilməsində səmərəli təcrübəni bölüşməkdir.
Koalisiya həmçinin maliyyə nazirliklərinə iqlim fəaliyyətinə üstünlük verməyə kömək göstərmək üçün yeni tövsiyələr dərc edib. Siyasi qərarlar qəbuluna cavabdeh şəxslər, həmçinin ən çox çirkləndirici sənaye və fəaliyyətləri karbonsuzlaşdırmağı hədəfləyən “keçid maliyyəsi”ni də müzakirə edib və potensialın artırılması və yeni “yaşıl” siyasət və proseslərin həyata keçirilməsi üçün proqramları genişləndirib. Koalisiyanın gələcək işlərinə İndoneziya və Niderland rəhbərlik edəcək”, – hesabatda vurğulanır.
XQ