Paşinyan, Blinken və Fon der Lyayen Brüsseldə görüşəcək

Brüsseldə Ermənistanın Baş naziri Nikol Paşinyan, ABŞ dövlət katibi Antoni Blinken və Avropa Komissiyasının sədri Ursula fon der Lyayen arasında görüş keçiriləcək.
Yeniavaz.com xəbər verir ki, planlaşdırılan görüşü ilk olaraq Ermənistan Təhlükəsizlik Şurasının katibi, Qərblə yaxınlaşmanın zəruriliyi ilə bağlı bəyanatları ilə tanınan və respublikada qərbyönlü siyasətin əsas ideoloqlarından biri sayılan Armen Qriqoryan elan edib.
“Ermənistanın inkişafına töhfə verəcək üçtərəfli əməkdaşlığın yollarının müzakirəsi planlaşdırılır. Tədbir həm də Ermənistanın davamlılığının artırılmasına yönəlib”, - Qriqoryan bildirib.
Qeyd edək ki, görüşlə bağlı qeyri-müəyyənlik və cəmiyyətdəki spekulyasiyalar tərəfləri qarşıdakı gündəmlə bağlı daha aydın danışmağa vadar edib. Xüsusən, Blinken bildirib ki, danışıqlar əsasən iqtisadi məsələlərə həsr olunub. Ermənistan Xarici İşlər Nazirliyi də görüşdə iqtisadi və humanitar məsələlərin müzakirə olunacağını bəyan edib.
Buna baxmayaraq, Ermənistanın Avropa İttifaqına üzvlüyə namizəd olmaq niyyəti ilə bağlı fəal söhbətlər və hakimiyyət tərəfindən aydın izahatların olmaması fonunda bu bəyanat İrəvanda və xaricdə Ermənistanın Brüsseldə hansısa geosiyasi dəyişikliklər və strateji müttəfiq olan Rusiya ilə münasibətlərin son pisləşməsi ilə bağlı bir təklif təqdim edəcəyinə işarə kimi qəbul edilib.
Ermənistan XİN-in məlumatına görə, Ermənistan hakimiyyətinin dəfələrlə bəyan etdiyi kimi, bu danışıqlar geosiyasi xarakter daşımır və başqa ölkələrə qarşı yönəlməyib.