İsrail Müdafiə Qüvvələrinin mətbuat xidməti "Hizbullah” lideri Həsən Nəsrullahın öldürüldüyü barədə açıqlama yayıb.
Məlumatda "Hizbullah”ın cənub cəbhəsinin komandiri Əli Kərxi və hərəkatın digər liderlərinin öldürüldüyü də iddia olunur.
Mətbuat xidməti qeyd edir ki, Həsən Nəsrullah İsrail Hərbi Hava Qüvvələrinin Beyrutdakı hərəkatın qərargahına endirdiyi zərbə nəticəsində həyatını itirib: "Livanın paytaxtı Beyrutun cənubundakı Dahiya qəsəbəsində yerləşən "Hizbullah”ın mərkəzi qərargahına zərbə sentyabrın 27-də axşam saatlarında endirilib”.
Bundan əvvəl İsrailin "12 kanal”ı "Hizbullah” qərargahına endirilən zərbə nəticəsində, Həsən Nəsrullahın qızı Zeynəbin də öldürüldüyü haqda məlumat yayıb.
"Hizbullah”ın Həsən Nəsrullahın ölümünü təsdiqlədiyi bildirilir.
"Hizbullah”ın yaydığı bəyanatda hərəkatın İsraillə mübarizəni davam etdirəcəyi də qeyd olunub.
Bu barədə "Reuters”in yaydığı məlumatda vurğulanır ki, sentyabrın 27-də axşam İsrail Müdafiə Qüvvələri Beyrutun cənub ətraflarında "Hizbullah”ın qərargahına hava hücumu həyata keçirib: "Bundan sonra Həsəb Nəsrullahla əlaqə kəsilib”.
1960-cı il doğumlu Həsən Nəsrullah 1992-ci ilin fevralından "Hizbullah”a rəhbərlik edir.
Onun sələfi Abbas əl-Musəvi də Livanda İsrail ordusu tərəfindən öldürülüb.
