Arxeoloqlar eramızın 4-cü əsrində Roma İmperiyasının sərhəddində ölmüş “barbar”ın məzarını aşkar ediblər.
Hafta.az-ın yazdığına görə, 60 yaşlı kişi; 1700 il əvvəl dulusçuluq, şüşə qablar və kiçik incə dişli daraq kimi qiymətli əşyalarla birlikdə dəfn edilib.
Tədqiqatçılar dəfn yerini Almaniyanın Ştutqart şəhərindən 65 kilometr şərqdə yerləşən Gerstetten kəndində evlərin tikintisi zamanı aşkarlayıblar.
Tədqiqatçıların dediyinə görə, diqqətlə qurulmuş türbə taxta kamerada yerləşdirilib.
Romalılar german qəbilələrini "barbarlar" adlandırdılar. İmperiya hüdudlarından kənarda yaşayan qeyri-Roma xalqı üçün işlətdikləri sözün hərfi mənası “başqa cür danışan insanlar”dır.
Arxeoloqlar bu adamın Yuxarı Reyn çayı hövzəsində yaşayan Alaman qəbiləsindən olduğunu bildiriblər.
V əsrin sonlarında barbar almanlar cənuba doğru enərək Qərbi Roma İmperiyasını işğal ediblər və bu imperiyanın dağılmasına səbəb olub.
IV əsrdən 8-ci əsrə qədər olan dövr Avropada böyük sosial-iqtisadi və mədəni dəyişikliklər dövrü idi. Lakin mötəbər yazılı mənbələr olmadığından bu dövr haqqında çox məlumat yoxdur.
Barbar qəbiristanlıqlarının arxeoloji tədqiqatları müasir Avropa cəmiyyətinin əsasını təşkil edən miqrasiya dövrü haqqında mühüm fikirlər verir, lakin hələ çox az sayda erkən alman qəbiristanlığı tapılıb. İndiyədək aşkar edilən məzarların əksəriyyəti Almaniyanın Fransa və İsveçrə ilə həmsərhəd olan Baden-Vürtemberq əyalətində olub.
Arxeoloqlar daha çox məzar tapmağın tarixin bu dövrünə daha çox işıq salacağını bildiriblər.
Ştutqart Regional Şurasının bəyanatında deyilir: “Məzarın aşkar edildiyi Bismarkstrasse-də qazıntılar may ayının əvvəlində türbənin tapılmasından bir həftə sonra tamamlandı”.
Ştutqart Regional Şurası yanında Tarixi Abidələrin Mühafizəsi üzrə Dövlət İdarəsi qazıntı yerindən tapılan iki keramika qabı təmir edib.
Qəbirdən radiokarbon təyini üçün götürülən qabırğa nümunəsi, kişinin eramızın 263-342-ci illəri arasında öldüyünü təsdiqləyib.
