“Rusiya beynəlxalq arenada tərəfdaşları ilə, o cümlədən Ermənistanla fəal ikitərəfli qarşılıqlı fəaliyyət göstərir. Bu yaxınlarda, avqustun 23-də Rusiya prezidenti Vladimir Putin ilə Ermənistanın baş naziri Nikol Paşinyan arasında telefon danışığı olub və bu zaman həmsöhbətlər təmaslarını davam etdirmək barədə razılığa gəliblər”.
Turkustan.az xəbər verir ki, bunu Rusiyanın Ermənistandakı səfiri Serhey Kopırkin deyib.
O, Rusiya və Ermənistan arasında ticarət-iqtisadi, mədəni-humanitar əməkdaşlığın da fəal inkişaf etdiyini söyləyib.
Bununla yanaşı, səfir qeyd edib ki, ikitərəfli münasibətlərin siyasi aspektdə müəyyən çətinliklər də var:
“Ölkələrimizin Xarici İşlər və Müdafiə nazirlikləri arasındakı əlaqələrin dinamikası bizim təşəbbüsümüzlə azalmadı. İrəvanı ölkəmizlə əlaqələri minimuma endirməyə və onları hər cür məhdudlaşdırmağa məcbur etməyə çalışan “kollektiv Qərb”in açıq təzyiqidir.
Buna baxmayaraq, biz Rusiya ilə Ermənistan arasında müttəfiqlik münasibətlərinin saxlanılması və dərinləşdirilməsinin hər iki ölkənin əsl, fundamental maraqlarına cavab verdiyinə inanmaqda davam edirik. Biz Ermənistan hakimiyyətinin problemli məsələlərin aradan qaldırılması üçün işləmək niyyətini açıq şəkildə qeyd edirik. Bunun praktikada tətbiqini səbirsizliklə gözləyirik. Biz öz tərəfimizdən buna hazırıq”.
Sergey Kopırkin Rusiyanın İrəvanla Bakı arasındakı dialoqda vasitəçi olmaq istəyindən də bəhs edib:
“Rusiya Ermənistanla Azərbaycan arasında danışıqlar prosesində “vicdanlı broker” rolundan heç vaxt imtina etməyib. Rusiya prezidenti Vladimir Putinin tərəfdaşları ilə son təmasları, xüsusilə avqustun 18-19-da Azərbaycana dövlət səfəri, prezident İlham Əliyev və baş nazir Nikol Paşinyanla Ermənistan-Azərbaycan münasibətlərinin normallaşması məsələlərinin müzakirə olunduğu telefon danışıqları bunun əyani təsdiqidir. Onu da xatırlamaq yerinə düşər ki, məhz Rusiya tərəfi və şəxsən Rusiya prezidenti Vladimir Putin sayəsində 2020-ci il müharibəsinin dayandırılmasına, iqtisadi və nəqliyyat kommunikasiyalarının açılması üçün üçtərəfli işçi qrupunun mexanizminin hazırlanıb həyata keçirilməsinə nail olunub.
Rusiya, Azərbaycan və Ermənistan liderlərinin bəyanatında “Regionda davamlı və uzunmüddətli sülhə nail olmaq üçün Azərbaycan Respublikası ilə Ermənistan Respublikası arasında sülh müqaviləsinin bağlanmasına fəal hazırlığın vacibliyi” xüsusi vurğulanıb”.
Səfir bildirib ki, Rusiya Federasiyası münaqişə tərəfləri arasında dialoq üçün hər cür kömək göstərməyə davam edəcəyini öhdəsinə götürüb.
“Rusiya tərəfinin sülh sazişinin işlənib hazırlanmasına yanaşması dəyişməz olaraq qalır, çünki bu, prezidentimizin imzaladığı sənəddə qeyd olunub. Təbii ki, belə yardımın həcmi və formaları tərəflərin hər biri üçün məqbul olmalıdır.
Əldə edilmiş üçtərəfli razılaşmalara uyğun olaraq, Moskva sülh müqaviləsi layihəsi üzrə danışıqlar üçün platformanı uğurla təmin etdi. Bir daha qeyd edim ki, biz bunu gələcəkdə də etməyə hazırıq. Biz hər iki nümayəndə heyətinin seçdikləri ikitərəfli formatda işləməsi üçün ən rahat şəraitin yaradılmasına zəmanət veririk.
Mayın 10-11-də Almatıda Azərbaycan və Ermənistan xarici işlər nazirlərinin məhsuldar görüşünü təşkil edən qazaxıstanlı tərəfdaşlarımızın səylərini alqışlamaya bilmərik. Belə görüşlərin 2020-2022-ci illərə aidüçtərəfli sazişlərə uyğun ən yüksək səviyyədə olması vacibdir ki, bu da sülh müqaviləsinin bağlanması ilə yanaşı, Azərbaycan və Ermənistan arasında nəqliyyat və iqtisadi əlaqələrin blokunun açılmasını, sərhədlərin müəyyənləşdirilməsini nəzərdə tutur”.
S.Kopırkin xatırladıb ki, tərəflər arasında müsbət nəticə əldə etmək üçün Rusiya regionda lazımi təcrübəyə, materiallara (kartoqrafik materiallar) və müvafiq səlahiyyətə malikdir.
“Üstəlik, “kollektiv Qərb”dən fərqli olaraq, biz Cənubi Qafqazı heç kimlə “qarşıdurma zonası” hesab etmirik. Artıq Qlobal Çoxluq ölkələri baş verən hadisələrin əsl məqsədini - regionu Rusiya ilə Qərbin növbəti qarşıdurma meydanına çevirmək, ölkəmizin maraqlarına istənilən vasitə ilə və nəyin bahasına olursa-olsun, hətta insan həyatına xələl gətirmək məqsədilə zərbə vurmaq istəyini aydın şəkildə anlayır.
Biz iki müttəfiqimiz arasında balanslaşdırılmış sülh müqaviləsinin bağlanmasını bölünməz təhlükəsizlik və davamlı sosial-iqtisadi inkişaf arxitekturasının qurulması üçün əvəzsiz ilkin şərt hesab edirik. Biz qalan fikir ayrılıqlarının tezliklə həllinə və ən yüksək səviyyədə üçtərəfli razılaşmalara uyğun olaraq Ermənistan-Azərbaycan münasibətlərinin normallaşmasının digər sahələrində uğurlu irəliləyişlərə ümid edirik.
Biz bundan sonra da Rusiyaya dost olan iki ölkənin və xalqların barışması üçün hərtərəfli dəstək verməyə, regionun bütün ölkələrinin təhlükəsizliyini və rifahını təmin etmək üçün qarşılıqlı məqbul və balanslaşdırılmış həll yollarının axtarışını təşviq etməyə hazırıq.
Rusiyalı səfri Zəngəzur dəhlizinin açılması məsələsinə də toxunub.
“Rusiya hər hansı konkret marşrutun yaradılmasını deyil, əksinə, Cənubi Qafqazda iqtisadi və nəqliyyat kommunikasiyalarının tamamilə açılmasını dəstəkləyir. 2021-ci ildə Rusiya, Azərbaycan və Ermənistan liderlərinin qərarı ilə üç ölkənin baş nazirinin müavinlərinin birgə sədrliyi ilə yaradılan Üçtərəfli İşçi Qrupu da məhz bununla məşğul olub.
Üçtərəfli İşçi Qrupu ritmik iş apardı və əhəmiyyətli nəticələr əldə etdi. Belə ki, qrupun 2023-cü ilin iyununda keçirilən 12-ci iclasında Ermənistan və Azərbaycan arasında dəmir yolu əlaqəsinin bərpası və təşkili ilə bağlı ümumi anlaşma razılaşdırılıb. Demək olar ki, hərtərəfli, balanslaşdırılmış razılaşma əldə etmişik. Təəssüf ki, bizim günahımız olmadan proses dalana dirənib. “Kollektiv Qərb”in təzyiqi ilə İrəvan bu istiqamətdə də üçtərəfli əməkdaşlığı dondurmaq qərarına gəlib.
Biz nəinki Cənubi Qafqazın nəqliyyat-kommunikasiya sistemini blokdan çıxarmaq, həm də bütövlükdə bütün region üçün davamlı sülh və firavanlıq bərqərar etmək üçün Üçtərəfli İşçi Qrupunun tam hüquqlu işini mümkün qədər tez bərpa etməyi zəruri hesab edirik”. (modern.az)
