Lidiya dövrünə aid 2500 illik qızıl boyunbağı Türkiyənin Bostondakı Baş Konsulluğunda təşkil edilən rəsmi mərasimlə Türkiyə rəsmilərinə təhvil verilib.
Publika.az xəbər verir ki, 1982-ci ildə Türkiyədən qaçaqmalçılıq yolu ilə ABŞ-a aparılan boyunbağı illərdir ki, Boston şəhərindəki muzeydə sərgilənib.
Böyük əhəmiyyət kəsb edən tarixi əsərin təhvil-təslim mərasimində Türkiyənin Bostondakı baş konsulu Murat Uğurluoğlu, Nyu-York Mədəniyyət və Tanıtma Attaşesi Hilal Dəmirəl və Boston Gözəl Sənətlər Muzeyinin rəsmiləri iştirak ediblər.
Hilal Dəmirəl boyunbağının təxminən 20 santimetr uzunluğunda qızıl daşlardan hazırlanmış muncuqlardan ibarət olduğunu bildirib: "O, eramızdan əvvəl 6-5-ci əsrlərə aiddir və Lidiya sənətinin xarakterik xüsusiyyətlərini daşıyır. Bu boyunbağının qaytarılması həm arxeoloji tədqiqatların inkişafı, həm də mədəni irsimizin qorunması baxımından mühüm addım hesab olunur".