Almaniyanın xarici işlər naziri Annalena Berbok Berlindəki beşulduzlu otellərdən birinin restoranında NATO-nun baş katibi Yens Stoltenberqlə gizli şam yeməyi edib.
Yenicag.az xəbər verir ki, bu barədə “Bild” qəzeti məlumat yayıb.
Nəşr qeyd edir ki, Berbok və Stoltenberq yeddi təhlükəsizlik əməkdaşının əhatəsində beşulduzlu oteldən çıxarkən görüntülənib.
“Bild”in məlumatına görə, Barbok və Stoltenberq “Telegraphenamt” otelinin restoranında təxminən üç saat vaxt keçiriblər.
Şahidlərin dediyinə görə, alman nazirlə NATO-nun baş katibi balıq yeyib, canlı fikir mübadiləsi aparıblar.
Nəşrin məlumatına görə, Stoltenberq Berbokdan görüş istəyib. Burada Avropanın təhlükəsizliyi və Ukraynaya gələcək yardım müzakirə edilib.
Bir gün əvvəl Berlində keçirilən tədbirdə çıxışı zamanı Stoltenberq müttəfiqləri Ukraynaya hərbi dəstək verilməsini sürətləndirməyə çağırıb və onun Rusiyaya qarşı genişmiqyaslı müharibədə qalib gəlmə şansının davam etdiyini vurğulayıb.
Xatırladaq ki, Stoltenberq daha əvvəl bəyan etmişdi ki, Alyansa üzv dövlətlər, onun fikrincə, öz müdafiə xərclərinə dair hədəfə çatmazdan əvvəl Ukraynaya daha çox hərbi yardıma üstünlük verməlidirlər.
