Həyata keçirilən layihələr dövlətimizin inkişafına xidmət edir

Kamilə Əliyeva

Milli Məclisin deputatı, professor

Prezident İlham Əliyev işğaldan azad edilmiş ərazilərimizlə yanaşı digər regionlarımızın da inkişaf etdirilməsinə böyük diqqət ayırır. Bu gün dünyada ərzaq çatışmazlığı fonunda, ölkəmizdə kənd təsərrüfatı və aqrar sahənin inkişaf etdirilməsi böyük əhəmiyyət kəsb edir. Ölkə başçımızın tapşırığına əsasən regionlarımızda böyük infrastruktur layihələr qurulur və Prezident İlham Əliyev bu layihələrin təməlqoyma və açılış mərasimlərində iştirak edir.

Ölkə başçımız aprelin 16-da yenidən qurulacaq Şirvan suvarma kanalının təməl qoyma mərasimində bu kanalın ölkəmizin kənd təsərrüfatının inkişaf etdirilməsində böyük əhəmiyyətə malik olması və gələcəkdə də bu sahədə görüləcək layihələr barədə çıxış etdi.

60 ildən çox müddətdir inşa edilmiş Yuxarı Şirvan kanalı torpaq mənşəli olduğu üçün külli miqdarda su itkiyə gedirdi. Bu da ətraf ərazilərin şoranlaşmasına gətirib çıxarır, torpağı əkinə yararsız hala salırdı. Yenidən qurulacaq Şirvan kanalı beton mənşəli olacaq və su itkisi demək olar ki, baş verməyəcək. Kanalın uzunluğu 120 km-dən 200 km qədər artırılacaq. Bununla da ətraf 10 rayonun fermer və fərdi təsərrüfatları lazımı qədər suvarma suyundan istifadə edə biləcək.

Ölkəmizdə həyata keçirilən bütün sosial və iqtisadi layihələr əhalimizin rifahının yaxşılaşdırılmasına və dövlətimizin iqtisadi inkişafına xidmət edir.

Ölkə başçımız çıxışında yaxın vaxtlarda Qarabağ kanalının da yenidən qurulacağını bildirdi. Qarabağ kanalı işğaldan azad edilmiş torpaqlarımızla yanaşı ətraf rayonlarda əkinçilik sahələrinin genişləndirilməsinə böyük təsir göstərəcək. 100 minlərlə hektar torpaq sahələri becəriləcək, yüksək məhsul əldə edilməsinə imkan yaranacaq. Bu gün Azərbaycan ölkə vətəndaşlarımızın tələbatını ödəmək üçün xarici dövlətlərdən taxıl idxal edir.

Prezident İlham Əliyev tərəfindən həyata keçirilənböyük infrastruktur layihələrin reallaşdırılması nəticəsində Azərbaycanın xaricdən taxıl idxalı minimuma endiriləcək və yaxın illərdə idxala son qoyulacaq. Qarabağ və Şərqi Zəngəzurda yeni su anbarları və kanalları da inşa ediləcək. Bu da Azərbaycan iqtisadiyyatının güclənməsinə böyük təsir göstərəcək. Bütün bu işləri Azərbaycan dövləti öz gücünə reallaşdırır. Bu Azərbaycanın güdrətinin göstəricisidir.