"Səbail" Azərbaycan Premyer Liqasının XXXIV turunda səfərdə "Sumqayıt"a 1:2 hesabı ilə məğlub olub.
Sportnet.az xəbər verir ki, Bakı təmsilçisinin baş məşqçisi Şahin Diniyev matçdan sonra keçirilən mətbuat konfransında jurnalistlərin suallarını cavablandırıb:
- Ulduzmağımıza baxmayaraq, meydanda əsl komanda var idi. "Sumqayıt"ı təbrik edirəm. Amma bu gün "Səbail" daha yaxşı futbol oynadı. Mənim üçün əsas oyundur. Oyun olduqca, nəticə gələcək. 6-cı yer də bizim üçün nəticədir. Gələn il daha yaxşı olacağıq. Yeni komandayıq. Stabilliyin çatmaması normaldır. İtirdiyimiz xallar bizi çox məyus edir. Avrokuboklar uğrunda mübarizə aparan komandaların hər biri ilə başabaş oynadıq. İrəliyə baxırıq, nikbinəm. Futbolçularımla fəxr edirəm. "Sumqayıt"ı 90 dəqiqə təzyiq altında saxladıq. Standart vəziyyətlərdən asan qollar buraxdıq. Bizim də penaltimiz var idi. O verilsəydi, oyun dəyişəcəkdi.
- Mövsümün əvvəlində yığdığınız sürəti sona çatdıra bilmədiniz. Səbəb nədir?
- Heyətin yeni olması imkan vermədi. Nə qədər rotasiyalar etmişəm. İdealı tapmaq üçün zaman lazımdır. 8 ayda bunları etmək çox çətindir. Biz "6-lıq" üçün oynayırdıq. Amma gələn il üç mövqeyi düzəldə bilsək, daha etibarlı oynayacağıq.
- Yeni mövsümlə bağlı rəhbərliklə danışığınız olub?
- Yox, hələ ki olmayıb. Problemlərin həllini düşünmək lazımdır.
- Bu mövsüm "Sumqayıt"a dörd oyunun hamısında uduzmusunuz...
- Bu gün hansı komanda güclü idi? Düşünürəm ki, “Səbail” güclü idi. Biz avrokubok hədəfi qoymamışdıq. Buna layiq olub-olmamaq başqa şeydir. Bu sözü komandaya demək olmaz. “Səbail” avrokuboklarda oynamağa layiq komandadır. Futbol faktı sevir. Düzdür, nəticələr ortadır.
