Fransa, Misir və İordaniya liderləri İsrailəə xəbərdarlıq etdilər

Misir, İordaniya və Fransa liderləri İsrailin Qəzza zolağının cənubundakı Rəfah şəhərində planlaşdırdığı hərbi əməliyyatın ciddi nəticələri barədə xəbərdarlıq ediblər.

Vətəninfo.az xəbər verir ki,   Misir prezidenti Əbdülfəttah əs-Sisi, İordaniya kralı II Abdullah və Fransa rəhbəri Emmanuel Makronun birgə bəyanatında bildirilir ki, bu addım regional vəziyyətin gərginləşməsinə təhlükə yaradır.

“Biz İsrailin Rəfahı işğalının təhlükəli nəticələri barədə xəbərdarlıq edirik. 1,5 milyondan çox fələstinli mülki şəxs oraya sığınıb. “Belə bir hücum yalnız daha çox ölüm və iztirablara səbəb olacaq, Qəzza zolağının əhalisinin kütləvi məcburi köçkünlüyünün risklərini və nəticələrini artıracaq və regional eskalasiya təhlükəsi yaradacaq”, – bəyanatda deyilir.

Əl-Sisi, II Abdullah və Makron Qəzza zolağının əhalisinə təsir edən aclıqdan narahat olduqlarını bildiriblər, təcili atəşkəsə nail olunmasının və anklava çatdırılan humanitar yardımın artırılmasının vacibliyini vurğulayıblar.

Aprelin 8-də İsrailin baş naziri Benyamin Netanyahu Rəfahda hərbi əməliyyata başlamaq planlarından əl çəkmədiyini açıqlayıb, lakin işğalın konkret tarixlərini açıqlamayıb.

Oktyabrın 7-də Fələstinin radikal HƏMAS hərəkatının yaraqlılarının hücumundan sonra İsraildə 1200 nəfər həlak olub, 250-yə yaxın adam əsir götürülüb. Yerli hakimiyyət orqanlarının məlumatına görə, İsrailin cavab hərbi əməliyyatları zamanı Qəzza zolağında qurbanların sayı 33 207 nəfərə çatıb.