Premyer Liqanın 2023/2024 mövsümündə qeyri-sabit çıxış edən “Sabah” Azərbaycan çempionatlarında səfərdə 100-cü qolu buraxıb.
Arena.az xəbər verir ki, bu, Azərbaycan Premyer Liqasının 29-cu turunun “Turan Tovuz”la səfər görüşünə təsadüf edib.
Bakı klubu 0:2 hesabı ilə uduzduğu görüşə qədər rəqib meydanlarında 99 top buraxmışdı. Hesabı açan Aleks Souza paytaxt təmsilçisinin qapısından 100-cü topu keçirib.
“Sabah” 85-ci səfər matçında bu qolu buraxıb.
Qeyd edək ki, “bayquşlar” cari mövsümdə 29 oyuna topladıqları 40 xalla 5-ci pillədə qərarlaşıblar. 11 qələbə qazanmış paytaxt təmsilçisi 7 heç-heçə edib, 11 məğlubiyyətə üzülüb. Rəqib qapılarından 39 top keçirmiş komanda 35 qol buraxıb.
