Razi Nurullayev DOST Agentliyinin fəaliyyətini tənqid etdi

“Birinci Qarabağ müharibəsində şəhid verən yüzlərlə ailə hələ də evlə təmin edilməyib. Onların xeyli hissəsi ilə görüşmüşəm. Son bir ildə görüşdüyüm şəhid ata və analarından bir neçəsi dünyasını dəyişib və onlar evlə təmin olunmadılar”.“Cebhe.info” xəbər verir ki, bunu parlamentin bugünkü plenar iclasında Milli Cəbhə Partiyasının (MCP) sədri, deputat Razi Nurullayev deyib.Deputat qeyd edib ki, onların 70-87 arası yaşları var, xəstə, əldən düşmüş, qocalıqdan belləri bükülmüş, bir çoxları yatağa məhkum olmuş şəhid ata və analardır:“Ağrılı cəhət budur ki, bu şəxslər dünyasını dəyişəndən sonra ailə ev almaq və şəhid statusu hüququnu itirir. Belə çıxır ki, Dayanıqlı və Operativ Sosial Təminat Agentliyi (DOST) gözləyir ki, onlar dünyalarını dəyişsinlər, onların da canı qurtarsın. Niyə ən asan və həm də humanizmdən kənar yolu seçirlər, başa düşmürəm. Axı onların evlə təminatına bütün maliyyə imkanları da var. Yenə bu günlərdə İmişli rayonundan bir şəhid anasının videosu yayılıb və qoy zəhmət çəkib onun altında yazılan minlərlə şərhləri oxuyub məsuliyyət hiss etsinlər, həm də görsünlər ki, yarıtmaz fəaliyyətləri nəticəsində dövlətin hansı şəxsləri söyülür və təhqir edilir.Bütün Azərbaycan boyu yaşı 60-dan ötmüş şəhid ata və anaları təxirəsalınmadan evlə təmin olunmalıdır. Cavan yaşlar gözləyə bilər, amma onların həyatı bitib, heç olmasa son günlərini normal vəziyyətdə yaşasınlar. Həm də dünyalarını dəyişəndə narazı və gözləri açıq getməsinlər. Vallah onların ah-naləsindən ziyan çəkənlərdən olarıq. Çıxan nəticə budur ki, yaşlı, xəstə şəhid ata və analarının evlə təminatı önə salınmalı və dövlət onlar qarşısında olan borcunu onlar dünyasını dəyişməmiş yerinə yetirməlidir”.Vilayət Muxtar
“Cebhe.info”