Fələstin Təhsil Nazirliyi İsrailin Qəzza zolağına hücumlarının başladığı vaxtdan bu yana Qəzzada 8572, işğal altındakı İordan çayının qərb sahilində isə 100 fələstinli tələbənin qətlə yetirildiyini açıqlayıb.
7News.Az xarici mediaya istinadən xəbər verir ki, işğal altındakı İordan çayının qərb sahilində 100 fələstinli tələbənin öldüyü, 494 tələbənin yaralandığı, 349 tələbənin isə nəzarətə götürüldüyü qeyd edilib.
Qəzza və İordan çayının qərb sahilində 497 müəllimin öldüyü, 3402 müəllimin isə yaralandığı bildirilib.
İşğal altındakı İordan çayının qərb sahilində 109-dan çox müəllim və idarəçinin İsrail əsgərləri tərəfindən nəzarətə alındığı bildirilib.
Oktyabrın 7-də İsrailin hücumları başladığı gündən Qəzza zolağında 620 mindən çox tələbənin təhsildən məhrum edildiyi, ağır sağlamlıq şəraitində yaşayan tələbələrin əksəriyyətinin travma və psixoloji problemlər yaşadığı bildirilib.
Qəzzada Səhiyyə Nazirliyinin son məlumatlarına görə, İsrailin 7 oktyabrdan bu yana Qəzza zolağına təşkil etdiyi hücumlarda azı 15 min 694-ü uşaq və 10 min 279-u qadın olmaqla 37 min 900 fələstinli həyatını itirib, 86 min 60 fələstinli isə yaralanıb.
7News.Az
