Macarıstan Aİ Şurasında altı aylıq sədrliyə başlayır.
Yeniavaz.com xəbər verir ki Macarıstanın sədrliyi iyulun 1-də başlayır və o, dekabrın sonunda rotasiya əsasında Polşaya ötürmək üçün estafeti Belçikadan götürür.
Ekspertlərin fikrincə, bu altı aylıq sədrlik Ukraynadakı münaqişə və miqrasiya da daxil olmaqla bir sıra məsələlərdə Aİ rəhbərliyi ilə ciddi fikir ayrılıqları fonunda start götürür. Belə ki, Budapeştlə Brüssel arasındakı çətin münasibətlər hətta prezidentlik üçün “Avropanı yenidən möhtəşəm edək!” şüarının seçilməsində də özünü göstərir. Bu, Aİ-nin hazırkı rəhbərliyi tərəfindən dəstəklənməyən, lakin Macarıstanın baş naziri Viktor Orban tərəfindən açıq şəkildə dəstəklənən ABŞ-nin keçmiş prezidenti Donald Trampın seçki şüarına bənzəyir.
Sədrliyin rəsmi loqosu Rubik kubudur, onun bir tərəfində Macarıstanın qırmızı, ağ və yaşıl bayrağı, digər tərəfində isə dairəvi düzülmüş ulduzlar şəklində Avropa İttifaqının gerbi təsvir edilir. Bu il macar mühəndis Ernö Rubikin ixtirasının 50 yaşı tamam olur.
Sədrliyin saytında qeyd edildiyi kimi, Rubik kubu Macarıstanın Aİ Şurasına sədrliyi üçün vacib olan keyfiyyətlər, başqa ifadə ilə strateji baxış, səbir, nizam-intizam və dəqiqlik tələb edir.
Macarıstanın sədrliyinin proqramında ən mühüm məqam Ukraynadakı münaqişənin tezliklə sona çatmasıdır.
Avropa İttifaqının qorunması və təhlükəsizliyinin təmin edilməsi. Buna nail olmaq üçün xüsusilə Avropanın müdafiə sənayesini inkişaf etdirmək və hərbi sifarişlər sahəsində əməkdaşlığı genişləndirmək təklif olunur ki, bu da Avropa Komissiyasının Aİ iqtisadiyyatının hərbiləşdirilməsi kursuna tam uyğundur.
Macarıstan həmçinin müttəfiqlərini Avropanın rəqabət qabiliyyətinə dair paktı hazırlamağa və bağlamağa dəvət edir.
İqtisadi həcm və ÜDM-in artım templəri baxımından həm ABŞ, həm də Çindən geridə qalan Aİ-nin rəqabət qabiliyyətliliyinin artırılması gündəlikdəki digər mühüm məsələdir.
Digər tərəfdən, Macarıstan qeyri-qanuni miqrasiyaya qarşı mübarizəni sədrliyinin digər prioritetinə çevirmək niyyətindədir.
Avropa İttifaqı məsələləri üzrə nazir Yanos Bokanın dediyi kimi, Macarıstanın sədrliyi möcüzə vəd etmir, lakin bəzi sahələrdə tərəqqi, digərlərində isə dəyişiklik ehtimalını vəd edir.
