Qəzza hökuməti humanitar yardımın zəifləməsi və yardım daşıyan yük maşınlarının sayının azalması səbəbindən Qəzza və şimal şəhərlərində aclıq təhlükəsi barədə xəbərdarlıq edib.
Qəzza hökumətinin mətbuat xidmətindən verilən açıqlamada keçən həftə Qəzzaya və şimal şəhərlərinə daxil olan yük maşınlarının sayının cəmi 224 olduğu bildirilib.
Açıqlamada yardım maşınlarının əksəriyyətinin Dünya Ərzaq Proqramının nəzarəti altında fəaliyyət göstərən 5 çörək zavodunun istehsalı üçün olduğu qeyd edilib.
Şəhərlərə daxil olan yardım maşınlarının sayının keçən həftə ilə müqayisədə 12 faiz azaldığı vurğulanıb.
Açıqlamada həmçinin sözügedən iki şəhərə gündəlik daxil olan yardım maşınlarının sayının 35-i keçmədiyi və bölgədə 700 mindən çox insanın mühasirə altında olduğu bildirilib.
Qeyd edək ki, oktyabrın 7-dən etibarən Qəzza zolağına ərzaq və ya digər humanitar yardım materiallarının daxil olmasında böyük çətinliklər yaşanır.
Rəfah sərhəd-buraxılış məntəqəsinin İsrail tərəfindən ələ keçirilməsi ilə Misirdən gələn yardımların ölkəyə daxil olmasının qarşısı alınıb.
