ABŞ hökuməti dağılmış Baltimor körpüsünün bərpasına 60 milyon dollar ayırıb

ABŞ hökuməti dağılmış Frensis Skott Key körpüsünün qalıqlarını təmizləmək və yenidənqurma işlərinə başlamaq üçün Merilend ştatına ilkin olaraq 60 milyon dollar ayırıb. Vətəninfo.az xəbər verir ki, bu barədə “Reuters” agentliyi məlumat yayıb.

Nəşrin yazdığına görə, bu, belə bir fəlakətdən sonra qeyri-adi sürətli ödənişdir.

Körpü martın 26-na keçən gecə yük gəmisinin toqquşması nəticəsində uçub. Həmin anda körpüdə işləyən 8 nəfərdən ikisi xilas edilib, ikisinin cəsədi çıxarılıb, qalan dörd nəfər isə itkin düşüb və ölmüş hesab olunur.

Merilend ştatının qubernatoru Wes Moore körpünün yenidən qurulması üçün 60 milyon dollar vəsait istəyib və bir neçə saat ərzində ABŞ Nəqliyyat Departamentinin Federal Avtomobil Yolları İdarəsi maliyyəni təsdiqləyib. Bu cür maliyyələşdirmənin təsdiqlənməsi adətən bir neçə gün çəkir, lakin ABŞ prezidenti Co Bayden körpünü tez bir zamanda bərpa etmək üçün federal hökumətə “göyü və yeri hərəkət etdirməyi” əmr etdiyini söylədi.

Mur bildirib ki, onlar üçün prioritet itkin düşənlərin cəsədlərini tapmaq, çayı təmizləməkdir ki, naviqasiyanı bərpa etmək mümkün olsun. Amma əvvəlcə mütəxəssislər qrupu dağılmış körpünün altında minlərlə konteynerlə qalan “Dali” yük gəmisini çıxarmalıdır.

Merilend ştatının rəsmilərinin fikrincə, ayrılan pul işlərin yalnız ilkin mərhələsi üçün kifayət edəcək. Mənbələrin məlumatına görə, federal səlahiyyətlilər körpünün yenidən qurulmasının ən azı 2 milyard dollara başa gələcəyini bildiriblər.