ABŞ Ali Məhkəməsi abort hüquqlarına dair federal təminatları ləğv etdikdən sonra ölkədə körpə ölümlərinin sayı nəzərəçarpacaq dərəcədə artıb.
“İki sahil” “Kommersant”a istinadla xəbər verir ki, bu barədə Ohayo Universitetinin alimlərinin “JAMA Pediatrics” elmi jurnalında dərc olunan araşdırmasında deyilir.
Həkimlər Maria Gallo və Parvati Singh milli uşaq ölümü məlumat bazasını təhlil edərək müəyyən ediblər ki, 2022-ci ilin iyununda Ali Məhkəmənin qərarından sonra ölkədə orta ölüm sayı 7% artıb. Vəziyyəti təhlil etmək üçün elm adamları 2022-ci ilin oktyabrı, həmçinin 2023-cü ilin mart və aprel ayları üçün məlumatları müqayisə ediblər.
Əvvəlki bir neçə ilin statistik məlumatlarına əsasən, orta hesabla körpə ölümlərinin sayı gözləniləndən 247 nəfər çoxdur. Bununla belə, ölüm hallarının böyük əksəriyyəti (bu 247-dən orta hesabla 204-ü) xromosom və genetik anomaliyalarla əlaqələndirilir. Alimlərin fikrincə, bu, abort qadağalarının təsirini göstərir. Əvvəllər belə uşaqların valideynləri uşağın sağlamlığı üçün kritik olan anormallıqları öyrəndikdən sonra hamiləliklərini dayandıra bilirdilər.
Alimlər Texasda araşdırma aparıblar, burada hamiləliyin altıncı həftəsindən sonra abortlara qadağa 2021-ci ildə qüvvəyə minib. Elm adamları daha sonra ştatda körpə ölümünün 2021-ci ildən 2022-ci ilə qədər 12,9% artdığını, ölkə üzrə orta göstəricinin 1,9% artdığını aşkar ediblər.
