Güney Azərbaycanda ekoloji fəlakətlə üzləşən dünyanın ikinci ən böyük duz gölü olan Urmiya gölü qurumaqda davam edir. İran hökumətinin biganəliyinin fəsadlarından olan bu ekoloji fəlakət bölgədə yaşayanları narahat edir.
Hafta.az-ın yazdığına görə, mövzu ilə bağlı açıqlama verən Tehran Universitetinin professoru Mehdi İsmaili Bidhəndi, gölün quruması səbəbindən duz fırtınalarının ucqar ərazilərə təsir edəcəyini bildirib. Ekoloji iqtisadiyyatın beləliklə iflic vəziyyətinə düşəcəyini və yoluxucu xəstəliklərin yayılacağını ifadə edən Bidhəndi, "Bu, böyük bir problemə çevriləcək, kənd təsərrüfatı məhv olacaq və ölkənin səhiyyə sisteminin qarşısını ala bilməyəcək səviyyədə xəstəliklərin yayılmasına səbəb olacaq" deyə xəbərdarlıq edib.
Gölün suyunun həcmi ən azı 15 milyard kubmetr olması lazım olduğu halda, Urmiya gölünün suyunun həcmi 1 milyard kubmetr olaraq qeydə alınıb. Ekoloqlar vurğulayırlar ki, bu göstərici gölün tamamilə quruması deməkdir.
Dünyanın ikinci ən böyük duz gölü olan Urmiya gölünün su səviyyəsi son 20 ildə əhəmiyyətli dərəcədə azalıb. İranın şimalında yaşayan Güney Azərbaycan türkləri bu vəziyyətə görə İran hakimiyyətini günahlandırırlar.
Güney Azərbaycanlı fəallar rəsmi Tehranın Urmiya gölünü qurutmaq niyyətinə dair çoxlu misallar sadalayırlar. İlkin səbəblərdən biri Urmiya gölü hövzəsindəki çaylarda ehtiyatsızlıqdan bəndlərin tikilməsidir. İran hökumətinin gölə axan çaylar üzərində 25 bənd inşa etdiyi məlumdur. O da vurğulanır ki, gölün ortasında tikilmiş körpü yolu gölü şimala və cənuba ayıraraq suyun keçidini məhdudlaşdırır və buna görə də gölün cənub hissəsinin quruması sürətlənir. O da bildirilir ki, kənd təsərrüfatı məqsədilə qazılan dərin su quyuları gölə axan yeraltı suyu qurudur.
Bütün bunları 2000-ci illərin əvvəllərindən dilə gətirdiklərini bildirən Güney Azərbaycan fəalları və ekoloqları bu müstəvidə verilən vədlərin yerinə yetirilmədiyini bildirirlər. Xüsusilə bu məsələ ilə bağlı keçirilən bütün nümayişlərdə yüzlərlə insanın həbs edildiyi bildirilir. Güney Azərbaycan türklərinin ana dili və kimlik məsələsindən sonra ən çox etiraz etdikləri məsələ məhz Urmiya gölüdür.
