2075-ci ilə qədər Türkiyə əhalisinin təxminən üçdə birini 65 yaşdan yuxarı yaşlılar təşkil edəcək.
Publika.az xəbər verir ki, bu barədə Türkiyə Statistika Bürosunun (TÜİK) proqnoz məlumatlarına istinadən məlumat yayılıb. Bildirilir ki, bədbin ssenariyə əsasən, əhalinin sayı 22-ci əsrə qədər 1,5 dəfədən çox azalacaq.
Əhalinin artımını qorumaq üçün hər qadının ən azı 2,1 uşaq doğması lazımdır. Lakin 2014-cü ildən bu yana Türkiyədə bu göstərici davamlı olaraq azalıb və 2023-cü ilə qədər 1,51-ə düşüb.
Mövcud demoqrafik tendensiyaların davam edəcəyini nəzərdə tutan əsas ssenariyə görə, 2023-cü ildə 85,4 milyon olan Türkiyənin əhalisi 2050-ci ilə qədər 93,7 milyona yüksələcək. Bundan sonra azalma başlayacaq və 2100-cü ilə qədər əhalinin sayı 77 milyon nəfərdən az olacaq.
Əgər məhsuldarlığın artırılması üzrə tədbirlər uğurlu olarsa, 2056-cı ilə qədər Türkiyənin əhalisi 100 milyonu keçə bilər. Ən pis ssenaridə əhalinin sayı 2100-cü ilə qədər 55 milyona düşəcək.
