EN

Ankarada Azərbaycan mədəniyyətinin Türkiyədə təbliğinin aktivləşdirilməsi yolları müzakirə edilib

Ankara, 2 may, AZƏRTAC

Mayın 1-də Azərbaycanın Türkiyədəki səfirliyində bir qrup mədəniyyət və incəsənət xadiminin, eləcə də kütləvi informasiya vasitələrinin nümayəndələrinin iştirakı ilə görüş keçirilib.

AZƏRTAC xəbər verir ki, tədbir iştirakçılarını salamlayan Azərbaycanın Ankaradakı səfiri Rəşad Məmmədov iki qardaş ölkənin mədəniyyətlərarası əlaqələrinin dərinləşməsinin vacibliyini qeyd edib.

Diplomatik missiyanın rəhbəri Türkiyədəki səfirliyin nəzdində Azərbaycan Mədəniyyət Mərkəzinin yeni rəhbəri Samir Məmmədovu təqdim edib və mədəniyyət və incəsənət ustalarını ikitərəfli əlaqələrin möhkəmləndirilməsində fəal iştirak etməyə çağırıb.

Səfir həmçinin mayın 25-də Türkiyə Prezidenti Administrasiyası kompleksinin Konsert zalında Azərbaycandan olan rəqs kollektivlərinin və hərbi orkestrinin iştirakı ilə təntənəli tədbirin keçiriləcəyini bildirib. Onun sözlərinə görə, tədbir Respublika Günü və Azərbaycan Silahlı Qüvvələri Gününə həsr olunacaq.

"Konsert proqramının yeri təsadüfən seçilməyib. Türkiyə Prezidenti Administrasiyasında tədbirlərin keçirilməsi hüququ Prezident Rəcəb Tayyib Ərdoğanın razılığı ilə verilən imtiyazdır və belə bir tədbirə icazə Azərbaycanın nüfuzunun sübutu və ölkəmizin mədəniyyətinin təbliği üçün yaxşı fürsətdir", – deyə diplomat vurğulayıb.

Rəşad Məmmədov bildirib ki, təxminən bir ildən sonra Kahramanmaraş şəhərində növbəti Azərbaycan Mədəniyyət Mərkəzinin açılışı olacaq.

"Mədəniyyət mərkəzi hər birinizə açıqdır və müxtəlif mədəni proqramlar və tədbirlər təşkil etmək üçün hər bir fikir və təşəbbüsü nəzərdən keçirməyə hazırıq", - deyə o bildirib.

Mədəniyyət Mərkəzinin rəhbəri Samir Məmmədovun sözlərinə görə, fəaliyyət yalnız tədbirlərlə məhdudlaşdırılmamalıdır. "Ölkəmizin, o cümlədən Qarabağ bölgəsinin və Qərbi Azərbaycanın mədəniyyətinin və irsinin hərtərəfli təbliği vacibdir. Bizim missiyamız xalq diplomatiyasıdır. Onun təşviqi üçün bütün imkanlar və zəngin təcrübə var", - deyə Mərkəzin rəhbəri vurğulayıb.

Samir Məmmədov onu da bildirib ki, Qars və İğdırda Azərbaycan Mədəniyyət Həftəsi keçiriləcək və Türkiyənin bir çox regionlarından xalçaçılıq məktəblərinin xalçaları nümayiş etdiriləcək. "Biz Azərbaycanın tarixi və mədəni irsinin bütün spektrini Türkiyənin geniş ictimaiyyətinə təqdim etməyə hazırıq", - deyə o əlavə edib.

Tədbir iştirakçıları, o cümlədən Xalq artisti Azərin, çıxışlarda toxunulan məsələlərə dair təklif və təşəbbüslər səsləndirib, Azərbaycan mədəniyyətinin təbliği və ölkə reallıqlarının Türkiyə ictimaiyyətinə çatdırılması məqsədilə mediastrukturlarla, o cümlədən TRT Teleradio Şirkəti ilə sıx əməkdaşlığa hazır olduqlarını qeyd ediblər.

 
Ramin Abdullayev

AZƏRTAC-ın xüsusi müxbiri

Ankara

Bütün xəbərləri reklamsız oxumaq üçün

Günlük ölkədə baş verən xəbərləri bizdən izlə.

Chosen
164
50
azertag.az

10Sources