Rusiya Federasiyasının Şimali Qafqaz regionunda yerləşən Kabarda-Balkarıstanın parlamentinin deputatları respublikanın hazırkı rəhbəri Kazbek Kokovu (hakim Vahid Rusiya Partiyası) ikinci beşillik müddətə seçiblər.
Modern.az "Kommersant"a istinadən xəbər verir ki, onun namizədliyini iclasda iştirak edən 69 deputatın hamısı yekdilliklə təsdiqləyib.
Kokovun andiçmə mərasimi bu gün baş tutacaq. Kokovdan başqa, “Ədalətli Rusiya - Həqiqət naminə” Partiyasından olan deputat Aleksey Voitov və Rusiya Federasiyası Kommunist Partiyası tərəfindən namizədliyi irəli sürülmüş Kabarda-Balkarıstanın təbii sərvətlər və ətraf mühit naziri İlyas Şavayev vəzifə üçün mübarizə aparırdılar.
Buna baxmayaraq, görüş zamanı bütün fraksiyaların rəhbərləri, onların fikrincə, özünü “ən yaxşı tərəfdən” göstərən respublikanın hazırkı rəhbərini dəstəkləyiblər.
Gizli səsvermənin nəticələri elan edildikdən sonra Kazbek Kokov prezident Vladimir Putinə “rəhbər vəzifəsinə namizədlər siyahısında olmaq şərəfinə”, o cümlədən deputatlara və “onların simasında Kabarda-Balkar xalqına” təşəkkür edib.
Onun sözlərinə görə, seçilməsini böyük məsuliyyət kimi qəbul edir: “Mənsubluğu ən yüksək qürur mənbəyi olan xalqa xidmət etməkdən yüksək dəyər yoxdur”.
