İspaniya yığmasının baş məşqçisi Luis de la Fuente “Barselona”nın 17 yaşlı yeniyetmə hücumçusu Lamin Yamal haqda söbət açıb.
Arena.az “Marca” nəşrinə istinadən, ispan mütəxəssisin bu barədə fikrini təqdim edir:
“Onu veteranlar çox yaxşı müşayiət edirdilər. Bütün bu müddət ərzində onu əhatəyə aldılar və idarə etdilər. Biz ona sakit, səbrlə dedik ki, bu, çox uzun müddətdir, çünki səni tərifləyənlər əksini desələr, qızarmazlar. Bu, bir gerçəklikdir. Yaşına görə çox yetkin olsa da, ona böyümək gərəkdir. Digər oğlanlardan daha çox. Bu təcrübə onun böyüməsinə kömək edir. O, şəxsən güclənməli, şəxsiyyət kimi tərəqqiyə davam etməli, dəyərlər qazanmalıdır. Bunun sayəsində o, peşəkarcasına inkişaf edəcək”, deyə Luis de la Fuente vurğulayıb.
Xatırladaq ki, İspaniya yığmasının vingeri Lamin Yamal 17 yaş 1 günlüyündə Avropa çempionatını qazanmış ən gənc oyunçu olaraq, adını futbol salnaməsinə yazıb.
Yamal yarışı yüksək səviyyədə keçirərək, 4 məhsuldar ötürmə ilə fərqlənib, həmçinin 1 qol vurub. Qollar və məhsuldar ötürmələrin cəmi üzrə Yamal 5 bal (1+4) toplayıb və komanda yoldaşı Daniel Olmo ilə birlikdə Avropa çempionatının ən səmərəli oyunçusu olub.
Lamin Yamal “Barselona”nın yetirməsidir. İstedadlı yeniyetmə 2022/2023-cü illər mövsümündən Kataloniya təmsilçisinin əsas komandasında çıxış edir. Yamalın “Barselona” ilə müqaviləsi 2026-cı ilin iyun ayının sonuna qədər qüvvədədir.
Artıq geridə qalmış 2023/2024 mövsümündə Yamal “Barselona”nın heyətində bütün yarışlarda 50 oyuna çıxıb, 7 qol vurub və 10 məhsuldar ötürmə verib.
Yamal 2023-cü ilin sentyabrında debüt etdiyi İspaniya yığmasının heyətində 14 oyun keçirib, 3 qol vurub, 8 məhsuldar ötürmə verib.
Lamin Yamalın qənimətlər muzeyində “Barselona” ilə 2022/2023-cü illər mövsümündə qazandığı İspaniya La Liqası var. Məlum olduğu kimi, Yamal İspaniya yığması ilə AÇ-2024-ün qalibi olub.
“Transfermarkt” internet-portalı 17 yaşlı ispaniyalı vingerin transfer dəyərini 120 milyon avro məbləğində qiymətləndirir.
