Ermənistan Şimal-Cənub layihəsi çərçivəsində İran sərhədinə yeni yolun tikintisinə fəal dəstək verir.
"Operativ Məlumat Mərkəzi-OMM" xəbər verir ki, yol İdarəsi Fondunun hesabatına görə, tikinti başa çatdıqdan sonra səyahət vaxtı təxminən iki saat azalacaq.
Aqarək-Kacaran yolunun 32 kilometrlik hissəsində (İran sərhədindən başlayaraq) işlər aparılır. Tikinti işlərinin 2028-ci ilə qədər başa çatdırılması gözlənilir. Podratçılar iki İran şirkətidir: Abad Rahan Pars International Group və Tunnel Sadd Ariana. Layihəyə 17 körpünün, 2 tunelin (ümumi uzunluğu 900 m) və 5 nəqliyyat qovşağının tikintisi daxildir.
60 kilometrlik Sisian-Kacaran magistralının və Kacaran tunelinin (Aqarağa doğru) layihələri artıq hazırdır və Ermənistan hakimiyyəti hazırda maliyyə axtarışındadır.
Sisian-Kacaran Şimal-Cənub layihəsinin ən çətin hissəsi hesab olunur. Buraya 27 körpü (ümumi uzunluğu 4,7 km) və 9 tunel (ümumi uzunluğu 12,5 km) daxildir.
Qismən yenilənən və genişləndirilən yol İran-Gürcüstan sərhədi arasındakı məsafəni 550 km-dən 460 km-ə endirəcək və Ermənistan, Hindistan və Körfəz ölkələrinin Qara dənizə çıxışını asanlaşdıracaq.
