İqtisadi Zonaların İnkişafı Agentliyinin (İZİA) təşkilatçılığı ilə Tovuzun Ceyrançöl ərazisində yerləşən aqroparka mediatur təşkil edilib.
İZİA-dan bildirilib ki, aqroparkın direktoru Şahmar Əzimli jurnalsitlərə görülmüş işlər barədə məlumat verib. Bildirilib ki, aqropark 3 fəaliyyət istiqaməti - ətlik heyvandarlıq, əkinçilik və ət emalı sahələri üzrə ixtisaslaşıb.
İndiyədək aqroparka 22,7 milyon manat investisiya yatırılıb. Ümumi ərazisi 550 hektar olan aqroparkda 75 nəfər daimi, 20 nəfər isə mövsümi işlə təmin edilib. 2023-cü ildə aqroparkın 368 hektarından 1617 ton buğda, 62 hektarından 480 ton dən qarğıdalı yığılıb. Bundan başqa, 2023-cü ildə aqroparkda 950 ton ət, cari ilin 6 ayı ərzində isə 520 ton ət istehsal edilib. Hazırda aqroparkın əkin sahələrində buğda və yonca biçini aparılır.
Bu il ilk dəfə olaraq aqroparkın 60 hektar ərazisində şəkər çuğundurunun əkini həyata keçirilib.
Aqroparkda ümumi tutumu 3000 kubmetr həcmində müasir taxıl anbarı, istehsal gücü saatda 10 ton olan yem zavodu və ümumi tutumu 40 ton olan soyducu kameralar fəaliyyət göstərir. Aqroparkın 1500 başlıq heyvandarlıq kompleksində 1200 baş cins iribuynuzlu heyvan saxlanılır.
Aqroparka İqtisadiyyat Nazirliyinin Sahibkarlığın İnkişafı Fondu tərəfindən 7 milyon manat güzəştli kredit verilib. Bundan başqa, nazirlik tərəfindən verilmiş investisiya təşviqi sənədi sayəsində texnika, texnoloji avadanlıqlar və qurğuların idxalına görə 0,29 milyon manata qənaət edilib.
Mənbə: AZƏRTAC
