Bakı, 10 iyun, AZƏRTAC
Mədəniyyət Nazirliyinin Respublika “Xatirə Kitabı” redaksiyası iyunun 12-də Şəki Şəhər Heydər Əliyev Mərkəzində “44 gün – Tarixi zəfər” adlı kitabın I və II cildinin təqdimatını keçirəcək.
Bu barədə AZƏRTAC-a “Xatirə Kitabı” redaksiyasından bildirilib.
Xatırladaq ki, birinci cilddə 44 günlük Vətən müharibəsi ilə yanaşı, 2016-cı ilin Aprel döyüşləri və Tovuz döyüşləri zamanı həlak olanların da adları əbədiləşdirilib. I və II cildlərdə ümumilikdə 2000-ə yaxın şəhid haqqında ensiklopedik məlumat yer alıb.
Redaksiya 44 günlük Vətən müharibəsində şəhid olmuş şəxslərin adlarının və xatirələrinin əbədiləşdirilməsi məqsədilə bir neçə cildlik kitab üzərində çalışır. Kitabın artıq 1-ci və 2-ci cildi işıq üzü görüb, 3-cü cild üzərində işlər aparılır.
Ümumilikdə Respublika “Xatirə Kitabı”nın indiyədək iyirmiyə yaxın cildi çap olunub.
Redaksiya, eyni zamanda, “Vətən daşı... və ya 44 günün dastanı” adlı layihə əsasında 8 sənədli film çəkib. Bu filmlər geniş ictimaiyyətə təqdim olunub.
Layihənin rəhbəri Respublika “Xatirə Kitabı” redaksiyasının baş redaktoru Nəzakət Məmmədovadır.
