Kim Çen İn qış sarayını sökür

Peyk görüntüləri Şimali Koreya lideri Kim Çen İnin qış sarayındakı bəzi binaların dağıdıldığı üzə çıxıb.

Hafta.az-ın “Newsweek”ə istinadən yazdığına görə, X-dakı @NobodyGerman adlı istifadəçinin mayın 4-də paylaşdığı peyk görüntülərində paytaxt Pxenyanın kənd ərazisində yerləşən Ryokpo sarayındakı bəzi binaların dağıdıldığı qeyd edilib.

Anonim X istifadəçisi öz paylaşımında deyib: "Son peyk görüntüləri Kim Çen İnin Ryokpo Sarayının bəzi hissələrinin söküldüyünü və ya təmir edildiyini göstərir".

Şimali Koreyaya yönəlmiş araşdırma platforması olan “NK Pro” da peyk görüntülərinin təhlil edildiyini və quruda genişmiqyaslı tikinti aparıldığını bildirib. Platforma əsas iqamətgahların və onlara bitişik digər kiçik tikililərin aprelin 21-dən 25-dək dağıdılmış ola biləcəyini iddia edib.

“NK Pro”ya danışan ekspertlər iddia ediblər ki, saray ərazisindəki iş böyük ehtimalla hərbi məqsədlər üçün aparılıb.

Xəbərdə iddia olunurdu ki, torpaqda yeni hərbi bina və obyektlər tikilə bilər.

Kimin saray ərazisində tikinti ilə bağlı iddialar Şimali Koreya ilə Cənubi Koreya arasında gərginliyin artdığı dövrə təsadüf edir. Cənubi Koreya və ABŞ Şimali Koreyanın hərbi təhdidlərinə qarşı potensiallarını gücləndirmək üçün aprelin 12-də təxminən 100 döyüş təyyarəsinin iştirakı ilə təlimə başlayıb. Buna reaksiya olaraq, Pxenyan administrasiyası aprelin 23-də düşmən hədəflərinə qarşı nüvə cavab ssenarisi üzərində işləmək üçün çoxsaylı reaktiv yaylım atəşi sistemlərindən istifadə edilən təlim təşkil edib.

Digər tərəfdən, Şimali Koreya ötən ay Cənubi Koreya ilə sərhədini birləşdirən və Hərbisizləşdirilmiş Bölgə (DMZ) daxilindəki yollara minalar qoyub. Yanvarda Kim iki ölkə arasında sərhəd boyunca bütün əlaqəni kəsmək üçün kəskin tədbirlərin görülməsini əmr edib.